کولکتہ، 14 فروری (یو این آئی) عادل رشید (تین وکٹ)، جوفرا آرچر اور لیام ڈاسن (دو دو وکٹ) کی بہترین گیند بازی کے بعد ٹام بینٹن (ناٹ آؤٹ 63) اور جیکب بیتھل (32) کی شاندار بلے بازی کی بدولت انگلینڈ نے ہفتہ کو ٹی-20 ورلڈ کپ کے 23 ویں مقابلے میں اسکاٹ لینڈ کو 10 گیندیں باقی رہتے پانچ وکٹوں سے شکست دے دی۔ ٹام بینٹن کو ’پلیئر آف دی میچ‘ کا ایوارڈ ملا۔153 رن کے ہدف کا تعاقب کرنے اتری انگلینڈ نے پہلے دو اووروں میں 13 رن کے اسکور پر اپنے دونوں سلامی بلے بازوں کی وکٹیں گنوا دیں۔ فل سالٹ (دو) اور جوس بٹلر تین رن بنا کر آؤٹ ہوئے۔ اس کے بعد جیکب بیتھل اور ٹام بینٹن کی جوڑی نے اننگز کو سنبھالا اور تیسری وکٹ کے لیے 66 رن جوڑے۔ 10 ویں اوور میں اولیور ڈیوڈسن نے جیکب بیتھل کو آؤٹ کر کے اس شراکت داری کا خاتمہ کیا۔ جیکب بیتھل نے 28 گیندوں میں دو چوکے اور ایک چھکا لگاتے ہوئے 32 رن بنائے۔ کپتان ہیری بروک چار رن بنا کر آؤٹ ہوئے۔ سیم کرن نے ایک چوکا اور دو چھکے لگاتے ہوئے 28 رن بنائے۔ انگلینڈ نے 18.2 اوورز میں پانچ وکٹوں پر 155 رن بنا کر مقابلہ پانچ وکٹوں سے اپنے نام کیا۔ ٹام بینٹن نے 41 گیندوں میں چار چوکے اور تین چھکے اڑاتے ہوئے ناٹ آؤٹ 63 رن کی میچ جتوائی اننگز کھیلی۔ ول جیکس 10 گیندوں میں 16 رن بنا کر ناٹ آؤٹ رہے۔اسکاٹ لینڈ کی جانب سے چار گیند بازوں نے ایک ایک وکٹ حاصل کی۔
اس سے پہلے آج یہاں کپتان رچرڈ بیرنگٹن (49)، مائیکل جونز (33)، ٹام بروس (24) اور اولیور ڈیوڈسن (ناٹ آؤٹ 20) کی شاندار بلے بازی کے دم پر اسکاٹ لینڈ نے 152 رن کا اسکور بنایا۔انگلینڈ نے ٹاس جیت کر پہلے گیند بازی کرنے کا فیصلہ کیا۔ بلے بازی کرنے اتری اسکاٹ لینڈ کی شروعات اچھی نہیں رہی اور اس نے 42 کے اسکور تک اپنی تین وکٹیں گنوا دیں۔ جارج منسی (چار)، برینڈن میک مولی (صفر) اور مائیکل جونز (33) رن بنا کر آؤٹ ہوئے۔ مائیکل جونز نے 20 گیندوں کا سامنا کیا اور پانچ چوکے اور ایک چھکا لگایا۔
اس کے بعد کپتان رچرڈ بیرنگٹن اور ٹام بروس نے اننگز کو سنبھالا اور چوتھی وکٹ کے لیے 71 رن جوڑے۔ 13 ویں اوور میں لیام ڈاسن نے ٹام بروس کو آؤٹ کر کے اس شراکت کو توڑا۔ ٹام بروس نے 18 گیندوں میں ایک چوکا اور ایک چھکا لگاتے ہوئے 24 رن بنائے۔ اگلے ہی اوور میں عادل رشید نے نصف سنچری سے ایک رن دور رہے رچرڈ بیرنگٹن کو اپنا شکار بنا لیا۔ رچرڈ بیرنگٹن نے 32 گیندوں میں پانچ چوکے اور دو چھکے لگاتے ہوئے 49 رن کی اننگز کھیلی۔ اس کے بعد انگلینڈ کے گیند بازوں نے بہترین گیند بازی کا مظاہرہ کرتے ہوئے اسکاٹ لینڈ کی ٹیم کو 19.4 اوورز میں 152 کے اسکور پر سمیٹ دیا۔
اولیور ڈیوڈسن 15 گیندوں میں دو چوکے اور ایک چھکا لگاتے ہوئے 20 رن بنا کر ناٹ آؤٹ رہے۔
انگلینڈ کے لیے عادل رشید نے تین وکٹیں حاصل کیں۔ جوفرا آرچر اور لیام ڈاسن کو دو دو وکٹیں ملیں۔ جیمی اوورٹن اور سیم کرن نے ایک ایک بلے باز کو آؤٹ کیا۔
بینٹن کی نصف سنچری، انگلینڈ نے اسکاٹ لینڈ کو 5 وکٹوں سے شکست دی
