چائباسہ میں 3.77لاکھ مستفیدین کو اثاثے اور 1479 نوجوانوں کو تقرری نامے تقسیم کیے
جدید بھارت نیوز سروس
چائباسہ ، 2 فروری:۔ جھارکھنڈ کے وزیر اعلیٰ ہیمنت سورین مغربی سنگھ بھوم ضلع کے ٹونٹو بلاک کے تحت سرینگسیا میں منعقد شیلانیاس، افتتاح اور اثاثہ جاتی تقسیم کی تقریب میں شریک ہوئے۔ اس موقع پر وزیر اعلیٰ نے سرینگسیا شہید اسمارک پر گلپوشی کر کے ان عظیم شہیدوں کو خراجِ عقیدت پیش کیا جنہوں نے انگریزی حکومت کے خلاف جدوجہد کرتے ہوئے اپنی جانوں کا نذرانہ پیش کیا۔
شہیدوں کی قربانی کو نئی نسل تک پہنچانے کا عزم
تقریب سے خطاب کرتے ہوئے وزیر اعلیٰ ہیمنت سورین نے کہا کہ بہادر شہیدوں کا احترام جھارکھنڈ کی روایت کا حصہ ہے اور اس روایت کو مزید مضبوط کیا جا رہا ہے تاکہ آنے والی نسلیں اپنے آبا و اجداد کی قربانیوں سے واقف ہو سکیں۔ انہوں نے کہا کہ جھارکھنڈ ہمیشہ سے سورماؤں کی سرزمین رہا ہے، جہاں آزادی کی تحریک کے آغاز سے قبل ہی قبائلی عوام نے انگریزوں کے خلاف جدوجہد کی، جس کی واضح مثال کولہان کا کول بغاوت ہے۔
197 ترقیاتی منصوبوں کا افتتاح و سنگ بنیاد
اس موقع پر وزیر اعلیٰ نے 398 کروڑ 19 لاکھ 35 ہزار 298 روپے کی لاگت سے 197 ترقیاتی منصوبوں کا سنگ بنیاد اور افتتاح کیا۔ ان میں 224 کروڑ 78 لاکھ 77 ہزار 843 روپے کی لاگت سے 122 منصوبوں کا سنگ بنیاد اور 173 کروڑ 40 لاکھ 57 ہزار 405 روپے کی لاگت سے 75 منصوبوں کا افتتاح شامل ہے۔
اثاثہ جاتی تقسیم اور روزگار کی فراہمی
وزیر اعلیٰ نے مختلف سرکاری محکموں کی اسکیموں کے تحت 3 لاکھ 77 ہزار 256 مستفیدین میں 637 کروڑ 43 لاکھ 13 ہزار 500 روپے کے اثاثے تقسیم کیے۔ اس کے علاوہ 1479 نوجوانوں کو تقرری نامے بھی فراہم کیے گئے۔
تعلیم، ترقی اور خواتین کو بااختیار بنانے پر زور
وزیر اعلیٰ نے کہا کہ ریاستی حکومت گاؤں کی سطح سے چل رہی ہے اور اسکیموں کا فائدہ سماج کے آخری فرد تک پہنچ رہا ہے۔ انہوں نے کہا کہ جب تک سماج معاشی، سماجی، تعلیمی اور فکری طور پر مضبوط نہیں ہوگا، ترقی ممکن نہیں۔ اسی مقصد کے تحت حکومت بچوں کی تعلیم پر خصوصی توجہ دے رہی ہے۔ غریب اور ضرورت مند بچوں کو بہتر تعلیم، مسابقتی امتحانات کے لیے مفت کوچنگ اور بیرونِ ملک اعلیٰ تعلیم کے لیے مکمل اسکالرشپ فراہم کی جا رہی ہے۔
انہوں نے کہا کہ خواتین کو خود کفیل بنانا حکومت کا عزم ہے۔ وزیراعلیٰ مئیاں سمان یوجنا کے تحت 18 سے 50 سال کی خواتین کو سالانہ 30 ہزار روپے کی مالی امداد دی جا رہی ہے تاکہ وہ خود مختار بن سکیں۔
اس پروگرام میں وزیر دیپک بیروا، رکن پارلیمنٹ جوبا مانجھی، ایم ایل اے نیرل پورتی، دشرتھ گگرائی، سکھرام اورائوں، سونارام سنکو، سویتا مہتو، سمیر موہنتی، سنجیو سردار، جگت مانجھی، سومیش چندر سورین، ضلع کونسل کے صدر لکشمی سورین، ڈپٹی انسپکٹر جنرل آف پولس انسپکٹر جنرل کیندر کمار اور پولیس افسر سمیت کئی عوامی نمائندے اور افسران موجود تھے۔
