21 لاشوں کے اعضاء فرانزک جانچ کے لیے روانہ، گورنر کا جائے وقوعہ کا دورہ
کولکاتہ :آنند پور کے جڑواں گوداموں میں لگی ہولناک آگ کو چار دن گزر چکے ہیں، مگر المیہ ختم ہونے کا نام نہیں لے رہا۔ حادثے کے بعد اب تک 27 افراد لاپتہ ہیں، جبکہ جائے وقوعہ سے 21 انسانی لاشوں کے اعضاء برآمد کیے جا چکے ہیں۔ تاہم ہلاک شدگان کی حتمی تعداد اب تک واضح نہیں ہو سکی، کیونکہ یہ تعین نہیں ہو پا رہا کہ برآمد شدہ اعضاء کن افراد کے ہیں۔پولیس ذرائع کے مطابق، باروئی پور پولیس ضلع میں 27 افراد کے لاپتہ ہونے کی باقاعدہ ڈائری درج کی گئی ہے۔ اب تک ملنے والے 21 اعضاء کو شناخت کے لیے سینٹرل فارنسک سائنس لیبارٹری بھیج دیا گیا ہے، جہاں ڈی این اے ٹیسٹ کے ذریعے مرنے والوں کی درست شناخت کی جائے گی۔ پولیس انتظامیہ شناخت کے عمل کو تیز کرنے کے لیے خود سی ایف ایس ایل سے رابطے میں ہے، جبکہ ضلع پولیس سپرنٹنڈنٹ بھی فوری کارروائی کے لیے لیبارٹری پہنچے ہیں۔جمعہ کے روز بھی جائے وقوعہ پر تلاش اور صفائی کا کام جاری رہا۔ ڈیکوریٹرز کے گودام کے ٹین شیڈ کو ہٹا کر ملبہ صاف کیا جا رہا ہے تاکہ یہ معلوم کیا جا سکے کہ آیا مزید انسانی اعضاء یا شواہد برآمد ہو سکتے ہیں۔ اسی دوران فرانزک ماہرین کی ایک خصوصی ٹیم نے دوبارہ علاقے کا دورہ کیا اور مختلف مقامات سے نمونے اکٹھے کیے۔واقعے کی سنگینی کے پیش نظر مغربی بنگال کے گورنر سی وی آنند بوس جمعہ کو دوپہر تقریباً 12.30بجے آنند پور پہنچے اور جلے ہوئے دونوں گوداموں کا معائنہ کیا۔ انہوں نے موقع پر موجود افسران سے تفصیلی معلومات حاصل کیں۔ دورے کے بعد میڈیا سے بات کرتے ہوئے گورنر نے کہا،“میں یہاں کسی پر الزام لگانے نہیں آیا ہوں، بلکہ حقائق جاننے آیا ہوں۔ تاہم انتظامیہ کو اس معاملے میں زیادہ محتاط ہونا چاہیے تھا۔ ایسے سنگین واقعے کے بعد ذمہ داری سے بچا نہیں جا سکتا۔”ادھر پولیس نے آتشزدگی کے معاملے میں کارروائی تیز کر دی ہے۔ واہ مومو گودام کے منیجر منورنجن شیٹ اور ڈپٹی منیجر راجہ چکرورتی کو جمعرات کی رات نریندر پور علاقے سے گرفتار کیا گیا۔ اس سے قبل دوسرے گودام کے مالک گنگادھر داس کو بھی گرفتار کیا جا چکا ہے۔ اس طرح اس معاملے میں اب تک تین افراد کو حراست میں لیا جا چکا ہے۔آنند پور کی اس المناک آتشزدگی نے نہ صرف کئی خاندانوں کو غیر یقینی اور کرب میں مبتلا کر دیا ہے بلکہ انتظامی غفلت، حفاظتی انتظامات اور ذمہ داریوں پر بھی سنگین سوالات کھڑے کر دیے ہیں۔ متاثرہ خاندان اب ڈی این اے رپورٹ اور اپنے پیاروں کی شناخت کے منتظر ہیں، جبکہ پورا علاقہ صدمے اور خوف کے سائے میں ہے۔
