ریاستی الیکشن کمیشن کی 48 بلدیاتی اداروں کے افسران کے ساتھ اہم میٹنگ
جدید بھارت نیوز سروس
رانچی، 16 جنوری :۔ ریاستی بلدیاتی انتخابات کی تیاریوں کو حتمی شکل دینے کے لیے ریاستی الیکشن کمیشن سرگرم ہو گیا ہے۔ جمعہ کے روز ریاست بھر کے تمام 48 بلدیاتی اداروں کے انتخابی افسران اور معاون انتخابی افسران کے ساتھ ایک اہم میٹنگ منعقد کی گئی۔ الیکشن کمیشن کے دفتر میں منعقد اس اجلاس و تربیتی پروگرام میں انتخابات سے متعلق تمام امور پر تفصیلی تبادلہ خیال کیا گیا۔ تربیتی پروگرام سے خطاب کرتے ہوئے ریاستی الیکشن کمشنر الکا تیواری نے کہا کہ جیسے ہی انتخابات کا اعلان ہوتا ہے، انتخابی افسران اور معاون انتخابی افسران کا کردار نہایت اہم ہو جاتا ہے۔
قواعد کے مطابق کام کرنے کی ہدایت
ریاستی الیکشن کمشنر نے کہا کہ نامزدگی کے دوران امیدواروں کی جانب سے بھرے جانے والے فارم اور انتخابی نشان کی الاٹمنٹ کے وقت انتخابی افسران کی ذمہ داری انتہائی اہم ہوتی ہے، جسے پوری چوکسی کے ساتھ انجام دینا چاہیے۔ انہوں نے انتخابی عمل سے جڑے تمام افسران کو ہدایت دی کہ کمیشن کی جانب سے جاری کردہ انتخابی ہدایت نامہ کا بغور مطالعہ کریں، کیونکہ اسی کے مطابق بلدیاتی انتخابات کو مکمل کرانا ہوگا۔ انہوں نے کہا کہ معمولی لاپروائی بھی تنازعات کا سبب بن سکتی ہے، اس لیے انتخابات کے دوران ہر کام قواعد کے مطابق کیا جائے۔
پرامن اور غیر جانبدار انتخابات پر زور
الکا تیواری نے کہا کہ انتخابات کا پرامن اور غیر جانبدارانہ انعقاد یقینی بنانا تمام افسران کی مشترکہ ذمہ داری ہے۔ انہوں نے خاص طور پر ووٹوں کی گنتی کے عمل کو انتہائی شفاف اور منصفانہ طریقے سے مکمل کرنے پر زور دیا۔ انتخابی عمل کے دوران امیدواروں اور ان کے حامیوں پر کڑی نظر رکھنے کی ہدایت بھی دی گئی۔
تیاریوں پر اطمینان کا اظہار
اس موقع پر ریاستی الیکشن کمیشن کے سکریٹری رادھے شیام پرساد نے انتخابات کی تیاریوں پر اطمینان کا اظہار کیا۔ انہوں نے کہا کہ انتخابی نوٹیفکیشن جاری ہوتے ہی ضابطہ اخلاق نافذ ہو جائے گا، جس پر عمل درآمد کرانا تمام افسران کی ذمہ داری ہوگی۔ ضرورت پڑنے پر آئندہ ویڈیو کانفرنسنگ کے ذریعے بھی افسران کو ہدایات دی جائیں گی۔
