غیر منصفانہ ووٹر لسٹ کی کارروائی کے خلاف کھڑے ہوں: ممتا بنرجی
جدید بھارت نیوز سروس
کولکاتہ:چیف منسٹر مغربی بنگال ممتا بنرجی نے ایک بار پھر الیکشن کمیشن پر سخت تنقید کی ہے اور الزام لگایا ہے کہ SIR (خصوصی نظرثانی) کے ذریعے ووٹر لسٹ سے جان بوجھ کر جائز ووٹروں کے نام خارج کیے جا رہے ہیں۔ منگل کو نوانومیں پریس کانفرنس کرتے ہوئے انہوں نے کہا کہ یہ ایک سازش ہے جس میں خواتین اور نئے ووٹر خاص طور پر نشانہ بنائے جا رہے ہیں۔ممتا بنرجی نے دعویٰ کیا کہ کمیشن نے اب تک 58 لاکھ ووٹروں کے نام ایک طرفہ طور پر حذف کر دیے ہیں۔ انہوں نے الزام لگایا کہ اس عمل میں مصنوعی ذہانت (AI) کا استعمال کیا جا رہا ہے اور شادی شدہ خواتین کے نام، جن کے پتہ یا کنیت میں تبدیلی ہوئی ہے، خاص طور پر ہٹائے گئے ہیں۔وزیر اعلیٰ نے کہا، یہ عمل بی جے پی کے مفاد میں ہو رہا ہے اور لوگوں کے بنیادی حق ووٹ کو چھیننے کی کوشش کی جا رہی ہے۔ اگر ووٹروں کے نام غیر منصفانہ طریقے سے کاٹے جا رہے ہیں تو ہمیں اس کے خلاف کھڑا ہونا ہوگا۔انہوں نے متوا برادری، مہاجر کارکنوں، نئے ووٹروں اور منتقل شدہ ووٹروں سے کہا کہ وہ یہ جانیں کہ ان کا نام کیوں فہرست سے خارج کیا گیا۔ متاثرہ ووٹروں کو مشورہ دیا گیا کہ وہ فارم 7 اور 8 بھریں اور بی ایل او، ای آر او یا ضلع مجسٹریٹ کے دفتر میں شکایت درج کرائیں، جس کے بعد انہیں رسید بھی ملے گی۔وزیر اعلیٰ نے مزید کہا کہ بہت سے حقیقی ووٹر، جن میں خواتین اور گھر بدلنے والے شامل ہیں، کے نام ہٹا دیے گئے، اور انہیں اس کی کوئی اطلاع نہیں دی گئی۔ انہوں نے دعویٰ کیا کہ منسوخ شدہ ناموں کی فہرست صرف بی جے پی کے پاس ہے اور کسی اور سیاسی جماعت کو نہیں دی گئی۔انہوں نے یہ بھی بتایا کہ بہار، مہاراشٹر اور ہریانہ میں بھی جائز ووٹروں کے نام ہٹائے گئے اور ووٹر لسٹ کی اشاعت کے دن ووٹنگ کا اعلان کر دیا گیا تاکہ کوئی عدالت میں اس کے خلاف جا نہ سکے۔ممتا بنرجی نے ایس آئی آرکی وجہ سے ہونے والی اموات کا ذکر کرتے ہوئے کہا کہ دباؤ اور ہراساں کیے جانے کے نتیجے میں 84 افراد ہلاک ہو چکے ہیں اور الیکشن کمیشن اور بی جے پی کو اس کی ذمہ داری قبول کرنی چاہیے۔ انہوں نے نوبل انعام یافتہ امرتیہ سین، شاعر جے گوسوامی اور سابق کرکٹر لکشمی رتن شکلا کے نام بھی اس فہرست سے خارج ہونے کی مثال دی۔وزیر اعلیٰ نے نگرانی اور مائیکرو مبصرین کے عمل پر بھی سوالات اٹھائے۔ انہوں نے الزام لگایا کہ BLA-2 کے نمائندوں کو سماعت میں داخل نہیں ہونے دیا گیا، جبکہ بی جے پی کے ایجنٹوں کو دخل اندازی کی اجازت تھی۔آخر میں، ممتا بنرجی نے سی اے اے کے خفیہ نفاذ اور باہر سے ووٹر بنانے کی کوششوں کی نشاندہی کی، اور کہا کہ الیکشن کے طریقہ کار پر عمل نہیں کیا جا رہا۔
