بڑے پیمانے پر بھرتیوں اور ترقیاتی پروجیکٹوں کو منظوری
جدید بھارت نیوز سروس
پٹنہ، 13 جنوری :وزیر اعلیٰ نتیش کمار کی صدارت میں منگل کے روز بہار کابینہ کی میٹنگ میں کل 43 ایجنڈا کو منظوری دی گئی۔کابینہ نے محکمہ زراعت میں 694 مختلف آ سامیوں پر بھرتیوں کی منظوری دی۔ ڈیری، فشریز، اور اینیمل ریسورس ڈیپارٹمنٹ میں بھی 200 آ سامیاں منظور کی گئیں۔ ممبئی میں 314 کروڑ روپے کی لاگت سے بہار بھون کی تعمیر کو بھی منظوری دی گئی۔ محکمہ تعلیم کے ڈائریکٹوریٹ آ ف ہائر ایجوکیشن میں نو نئی آ سامیاں بنانے کی بھی منظوری دی گئی۔میٹنگ میں جھارکھنڈ کے ساتھ سون ندی سے پانی کی تقسیم کے سلسلے میں ایک مفاہمت کی یادداشت پر بھی اتفاق ہوا۔ طے شدہ معاہدے کے مطابق 7.75 ملین ایکڑ فٹ پانی میں سے 5.75 ملین ایکڑ فٹ پانی بہار اور 2 ملین ایکڑ فٹ جھارکھنڈ کو جائے گا۔کابینہ نے دربھنگہ ہوائی اڈے کے قریب لاجسٹک پارک اور کارگو ہب کی تعمیر کے لیے 50 ایکڑ اراضی کے حصول کو منظوری دی۔ اس مقصد کے لیے 138 کروڑ 82 لاکھ 88 ہزار روپے کی رقم منظور کی گئی ہے۔ مزید برآں بہار ایڈوکیٹس ویلفیئر ٹرسٹ کمیٹی کے لیے 30 کروڑ روپے کی یکمشت امداد کی منظوری دی گئی۔ چیف جسٹس سے منسلک قانونی معاونین کے لیے چار عہدے بنانے کی منظوری بھی دی گئی۔اے آئی سی ٹی ای نئی دہلی کے ذریعہ منظور شدہ ڈپلومہ سطح کے چار نئے کورسز بھاگلپور گورنمنٹ پولی ٹیکنک ٹیکسٹائل ٹیکنالوجی انسٹی ٹیوٹ میں متعارف کرائے جائیں گے۔ ان میں کمپیوٹر ایڈیڈ کاسٹیوم ڈیزائن اور ڈریس میکنگ (60 نشستیں)، فیشن اور کپڑے کی ٹیکنالوجی (60 نشستیں)، گارمنٹ ٹیکنالوجی (60 نشستیں) اور ٹیکسٹائل ٹیکنالوجی (60 نشستیں) شامل ہیں۔ محکمہ سائنس اینڈ ٹیکنالوجی میں 106 نئی آ سامیاں بنانے کی منظوری بھی دی گئی۔ ریاست بھر کی 13 جیلوں میں 9,073 نئے سی سی ٹی وی کیمرے لگانے کی بھی منظوری دی گئی۔ اس پروجیکٹ پر 155 کروڑ 38 لاکھ 36 ہزار 153 روپے لاگت آ ئے گی۔کابینہ نے جموئی کے اس وقت کے ضلع اقلیتی بہبود افسر جتاشنکر پانڈے کو ملازمت سے برخاست کرنے کی منظوری دی۔ پی ایم شری اسکیم کے تحت، مالی سال 2025-26 میں بہار میں 779 سیکنڈری اور ہائر سیکنڈری اسکولوں کے لیے 14,855 ملین روپے کی رقم منظور کی گئی۔ کابینہ نے یہ بھی فیصلہ کیا کہ بہار لیجسلیچر کے سینئرممبران، جو کونسل آف منسٹرس کے ممبر نہیں ہیں، کو لیجسلیچر پول میں ان کے حلقہ وار مختص رہائش گاہوں کے علاوہ سنٹرل پول سے 15 مکانات اضافی کرائے کی رہائش کے طور پر الاٹ کیے جائیں گے۔
