منریگا کو ختم کرنا دیہی معیشت کے لیے خطرناک: وزیر شلپی نیہاترکی
جدید بھارت نیوز سروس
رانچی،08؍ جنوری:مانڈر کے فاریسٹ میدان میں سن 1857 کے انقلاب کے عظیم ہیرو ویر شہید شیخ بھکاری اور ویر شہید ٹکیت امراؤ سنگھ کے یومِ شہادت پر ایک پروگرام منعقد کیا گیا۔ اس پروگرام میں ریاست کی وزیر زراعت، مویشی پروری اور کوآپریٹیو شلپی نیہا تِرکی نے دونوں عظیم ہیروز کی تصویر پر گلہائے عقیدت پیش کیے۔ اس موقع پر وزیر شلپی نیہا تِرکی نے کہا کہ موجودہ دور میں دونوں عظیم ہیروز کی شہادت کو سمجھنے اور اس سے سبق لینے کی ضرورت ہے۔ہندو اور مسلم دونوں کی مشترکہ کوششوں سے ہی ہندوستان انگریزوں کی غلامی سے آزاد ہو سکا تھا۔ انہوں نے کہا کہ اگر جنگِ آزادی کی لڑائی میں ہندو راشٹر یا مسلم راشٹر کی سوچ ہوتی تو یہ ممکن نہ ہو پاتا۔اس وقت صرف دل میں ملک کی آزادی کا جنون تھا۔ آج معاشرے کے اندر انگریزوں کی سوچ کی طرح ہی ‘پھوٹ ڈالو اور راج کرو ‘ کی سیاست ہو رہی ہے، اس سازش کو ناکام بنانا ہوگا۔وزیر موصوفہ نے کہا کہ نام بدلنے کی سیاست سے ملک اور ریاست کھوکھلی ہو رہی ہے۔ دیہی معیشت کی ریڑھ کی ہڈی کہلانے والی اسکیم ‘منریگا ‘ کو آج ختم کیا جا رہا ہے، جس سے روزگار کے نام پر گاؤں کے لوگ ایک بار پھر ہجرت پر مجبور ہوں گے۔انہوں نے کہا کہ ریاستی حکومت نے ‘پیسا ‘ (PESA) رولز نافذ کر کے روایتی نظام کو مضبوط کرنے کا کام کیا ہے۔ روایتی گرام سبھا کے ذریعے زمین کے حصول سے لے کر جنگلاتی پیداوار کے مسائل حل ہو سکیں گے۔ لیکن کچھ لوگ پیسا رولز کو معاشرے کے سامنے غلط طریقے سے پیش کرنے میں لگے ہوئے ہیں۔ معاشرے کو بانٹنے والے لوگ تب تک کامیاب نہیں ہوں گے جب تک ہم سب متحد رہیں گے۔یومِ شہادت کے پروگرام میں دیہاتیوں کے درمیان کمبل بھی تقسیم کیے گئے۔ اس پروگرام میں بی ڈی او چنچلا کماری، بلاک صدر منگا اوراؤں، بلاک صدر اشتیاق، شمیم اختر، مجیب اللہ، سریتا تِگا، نسیم انصاری، نسیمہ خاتون، ہوسے اوراؤں، سوکا اوراؤں، جمیل ملک، رشید، سنجے، جوئیل تِگا، میری ایکا، ارجن مہتو، بندھو ٹوپو، آزاد انصاری، منگلیشور اوراؤں سمیت دیگر اہم شخصیات موجود تھیں۔
