وزیر اعلیٰ ہیمنت نے جے پال سنگھ منڈا اور ساوتری بائی پھولے کو خراج عقیدت پیش کیا
جدید بھارت نیوز سروس
رانچی، 3 جنوری:۔ جھارکھنڈ کے وزیراعلیٰ ہیمنت سورن نے دوراندیش قبائلی رہنما جے پال سنگھ منڈا کی جینتی پر انہیں خراج عقیدت پیش کیا۔ وزیر اعلیٰ نے کہا کہ جے پال سنگھ منڈا نے قبائلی شناخت، حقوق اور خودمختاری کی آواز کو قومی سطح تک پہنچایا۔ وہ نہ صرف ایک عظیم کھلاڑی تھے بلکہ آئین ساز اسمبلی میں قبائل کی عزت اور حقوق کے سب سے پرزور محافظ بھی تھے۔ وزیراعلیٰ نے مزید کہا کہ ’’قبائلی کوئی پسماندہ نہیں، بلکہ سب سے پہلے اس ملک کے شہری ہیں‘‘۔ یہ سوچ ان کے نظریات اور جدوجہد کی بنیاد تھی۔ جل، جنگل اور زمین پر قبائلی سماج کے حقوق یقینی بنانا ان کا خواب تھا۔ ان کی زندگی آج بھی ہمیں انصاف، خود اعتمادی اور قبائلی خودمختاری کیلئے جدوجہد کرنے کی ہمت دیتی ہے۔ اس موقع پر اپوزیشن لیڈر بابولال مرانڈی نے بھی جے پال سنگھ منڈا کی جینتی پر انہیں خراج عقیدت پیش کیا۔ انہوں نے کہا کہ اولمپک میں بھارتی ہاکی ٹیم کی سنہری کامیابی کی شروعات اپنے قیادت میں کرنے والے سابق کپتان، آئین ساز اسمبلی کے رکن اور سیاسی نظریہ ساز جے پال سنگھ منڈا کو سادہ نمن۔
ساوتری بائی پھولے کو یاد کیا
وزیراعلیٰ ہیمنت سورن نے ساوتری بائی پھولے کی جینتی پر انہیں بھی خراج عقیدت پیش کرتے ہوئے کہا کہ وہ ایک بہادر سماجی مصلح تھیں، جنہوں نے تعلیم کو سماجی مساوات کی سب سے بڑی طاقت بنایا۔ انہوں نے کہا کہ ساوتری بائی پھولے نے صرف الفاظ سے نہیں بلکہ اپنی زندگی کے جدوجہد سے مساوات اور انصاف کا مفہوم سمجھایا۔
