گنگا ساگر یاترا 2026: سیالدہ ڈویژن کی میگا تیاری

کولکاتہ :کولکاتہ میں گنگا ساگر میلہ 2026 کے لیے ایسٹرن ریلوے کے سیالدہ ڈویژن نے بڑے پیمانے پر تیاری مکمل کر لی ہے۔ سیالدہ کے ڈویژنل ریلوے منیجر (ڈی آر ایم) راجیو سکسینہ نے ایک پریس کانفرنس میں بتایا کہ اس بار یاتریوں کی سہولت، سلامتی اور وقار کو سب سے زیادہ ترجیح دی گئی ہے۔ یہ خصوصی انتظامات 9 جنوری سے 17 جنوری 2026 تک نافذ رہیں گے۔ڈی آر ایم کے مطابق گنگا ساگر یاترا کے دوران لاکھوں عقیدت مندوں کی آمد کو دیکھتے ہوئے ٹرین خدمات، ہجوم کنٹرول، سیکورٹی اور طبی سہولیات میں غیر معمولی اضافہ کیا گیا ہے۔ کاکدویپ میں 24 گھنٹے میلہ افسر تعینات رہے گا تاکہ ہر صورتحال پر فوری نظر رکھی جا سکے۔ریلوے حکام نے بتایا کہ اس سال پہلی بار روزانہ 23 جوڑی ای ایم یو ٹرینیں چلائی جائیں گی، جن میں سیالدہ سے نم خانہ اور کاکدویپ کے درمیان 10 جوڑی خصوصی میلہ ٹرینیں شامل ہیں۔ مجموعی طور پر 2026 میں 126 خصوصی ٹرینیں چلیں گی، جو پچھلے سال کے مقابلے میں نمایاں اضافہ ہے۔ اس سے پلیٹ فارم پر بھیڑ اور مسافروں کے انتظار کا وقت کم ہوگا۔سیالدہ میں پلیٹ فارم نمبر 15 اور 16 جبکہ کاکدویپ میں پلیٹ فارم نمبر 2 کو صرف گنگا ساگر یاتریوں کے لیے مختص کیا گیا ہے۔ ہر ٹرین میں تقریباً 2000 سے 2500 یاتریوں کے سفر کی گنجائش ہوگی۔ بورڈنگ اور ڈی بورڈنگ کو منظم رکھنے کے لیے قطار مینیجر تعینات کیے جائیں گے اور ’’پہلے آئیں، پہلے پائیں‘‘ کا اصول سختی سے نافذ ہوگا۔ہجوم کو قابو میں رکھنے کے لیے یک طرفہ آمد و رفت کا نظام بنایا گیا ہے۔ سیالدہ میں یاتریوں کا داخلہ مخصوص گیٹ سے ہوگا جبکہ باہر نکلنے کا راستہ الگ رکھا گیا ہے۔ کاکدویپ اور نم خانہ میں بھی بڑے ہولڈنگ ایریاز بنائے گئے ہیں، جہاں بیٹھنے، روشنی، صاف بیت الخلاء، پینے کے پانی اور ٹکٹنگ کی سہولیات دستیاب ہوں گی۔سیکورٹی کے لیے 54 افسران اور 340 آر پی ایف اہلکار تعینات کیے گئے ہیں۔ سی سی ٹی وی نگرانی، ڈاگ اسکواڈ اور رات کی ٹرینوں میں خصوصی سیکورٹی دستے بھی موجود رہیں گے۔ اس کے ساتھ ہی تینوں اہم اسٹیشنوں پر 24 گھنٹے طبی بوتھ، ڈاکٹر، ایمبولینس، وہیل چیئر اور اسٹریچر کی سہولت فراہم کی گئی ہے۔ڈی آر ایم راجیو سکسینہ نے کہا،گنگا ساگر میلہ صرف ایک انتظامی چیلنج نہیں بلکہ ایک مقدس ذمہ داری ہے۔ ہماری کوشش ہے کہ ہر یاتری کا سفر محفوظ، باوقار اور آرام دہ ہو۔ریلوے کے ان جامع انتظامات سے توقع ہے کہ گنگا ساگر یاترا 2026 اس بار پہلے سے زیادہ منظم اور سہل ثابت ہوگی۔