وزیر اعلیٰ نے حکومت کی جانب سے حوصلہ افزائی رقم کا چیک سونپا
جدید بھارت نیوز سروس
رانچی،30؍دسمبر:وزیر اعلیٰ ہیمنت سورین سے آج کانکے روڈ، رانچی میں واقع وزیر اعلیٰ کی رہائشی بستی میں ٹرپل آئی ٹی، رانچی میں قبائلی برادری سے منتخب ہونے والی سب سے کم عمر کی پی ایچ ڈی امیدوار سویتا کچھپ نے ملاقات کی۔ اس موقع پر وزیر اعلیٰ ہیمنت سورین نے انہیں اپنی جانب سے دلی مبارکباد اور نیک خواہشات پیش کیں۔ وزیر اعلیٰ نے سویتا کچھپ کو پی ایچ ڈی کی تعلیم مکمل کرنے کے لیے ریاستی حکومت کی جانب سے 2 لاکھ روپے کی ترغیبی رقم کا چیک ان کے اہل خانہ کے حوالے کیا۔ اس موقع پر وزیر اعلیٰ کے سامنے سویتا کچھپ نے بتایا کہ وہ ڈونگری ٹولی، ارگوڑہ، رانچی کی رہائشی ہیں اور فی الحال مدھوکم میں اپنی نانی کے گھر رہ کر تعلیم حاصل کر رہی ہیں۔ انہوں نے وزیر اعلیٰ کو آگاہ کیا کہ وہ قبائلی برادری میں سب سے کم عمر (24 سال) کی امیدوار ہیں جن کا انتخاب ٹرپل آئی ٹی، رانچی میں پی ایچ ڈی کے لیے الیکٹرک کمیونیکیشن انجینئرنگ کورس میں ہوا ہے۔ وہ ٹیکنیکل فیلڈ میں پہلی قبائلی ریسرچ اسکالر بھی ہیں اور IEEE میں بین الاقوامی ناویلٹی ریسرچ ورک پیش کر چکی ہیں۔ اس موقع پر وزیر اعلیٰ ہیمنت سورین نے سویتا کچھپ کی حوصلہ افزائی کرتے ہوئے کہا کہ وہ اپنی تعلیم اور تحقیقی کام جاری رکھیں، ریاستی حکومت ان کی ہر ممکن مدد کرے گی۔ اس موقع پر سویتا کچھپ کے اہل خانہ اور دیگر افراد موجود تھے۔
