لیونل میسی کا کولکتہ میں شاندار استقبال، ایک جھلک نہ ملنے پر شائقین برہم

کولکتہ، 13 دسمبر (یو این آئی) ارجنٹینا کے فٹبال آئیکن لیونل میسی کی 14 سال بعد فٹبال کے دیوانوں کے شہر کولکتہ واپسی پر ان کا شاندار استقبال کیا گیا۔شہر میں ہزاروں مداح اپنے پسندیدہ عالمی سپر اسٹار کی ایک جھلک پانے کے لیے آدھی رات سے ہی شدید سردی کے باوجود ڈٹے رہے۔ تاہم بعد میں سالٹ لیک اسٹیڈیم میں یہ جوش و خروش اس وقت بدنظمی اور مایوسی میں بدل گیا، جب شائقین میسی کی ٹھیک طرح سے ایک جھلک بھی نہ دیکھ سکے۔میسی کا طیارہ کل دیر رات نیتاجی سبھاش چندر بوس بین الاقوامی ہوائی اڈے پر اترا۔ ان کی آمد پر وہاں موجود لوگوں میں جوش کی لہر دوڑ گئی۔ ان کے حامی بارسلونا کی نمبر 10 جرسی پہنے میسی کا نام لے کر نعرے لگا رہے تھے اور ارجنٹینا کے جھنڈے لہرا رہے تھے۔ سخت سکیورٹی کے باوجود ہجوم ہوائی اڈے کے احاطے اور حیات ریجنسی ہوٹل کے قریب جمع ہو گیا، جہاں میسی کو ٹھہرایا گیا تھا۔’ہندوستانی فٹبال کا مکہ‘ کہلانے والے شہر کولکتہ نے میسی کے دوسرے دورے کو یادگار بنانے کے لیے دل کھول کر تیاریاں کی تھیں۔ ان میں ای ایم بائی پاس پر لیک ٹاؤن کراسنگ کے قریب فین زون اور 70 فٹ اونچا مجسمہ بھی شامل تھا۔ ذرائع کے مطابق، سالٹ لیک اسٹیڈیم کے قریب ہوٹل جاتے وقت شہر کے داخلی راستے وی آئی پی روڈ پر بگ بین کلاک ٹاور کے پاس میسی کا ایک سفید مجسمہ نصب کیا گیا تھا، جس میں وہ فیفا ورلڈ کپ تھامے ہوئے دکھائے گئے۔مداحوں کے ہجوم میں ندیہ ضلع کے کلیانی سے ایک نوعمر لڑکا وہیل چیئر پر سفر کر کے بھی آیا تھا۔ میسی کے پرجوش حامی انہیں فٹبال کا بھگوان مانتے ہیں۔ موہن باگان کلب کے رکن سرجیندو گانگولی نے کہا، ’’میسی کا کولکتہ آنا ایک بہت بڑی بات ہے۔ یہ ویسا ہی ہے جیسے 1977 میں پیلے ہمارے کلب کے خلاف دوستانہ میچ کھیلنے اس شہر آئے تھے۔ اس وقت بھی شہر میں اسی طرح کا جوش و خروش دیکھا گیا تھا۔‘‘انٹر میامی کے لیے کھیلنے والے 38 سالہ میسی کا شہر میں مختصر پروگرام تھا، جس کے بعد انہیں شام کو ایک نمائشی تقریب کے لیے حیدرآباد روانہ ہونا تھا۔ویویکانند یووا بھارتی اسٹیڈیم میسی کے لیے خاص اہمیت رکھتا ہے۔ یہیں 2 ستمبر 2011 کو انہوں نے پہلی بار ارجنٹینا کی کپتانی کرتے ہوئے وینزویلا کے خلاف ایک بین الاقوامی دوستانہ میچ میں اپنی ٹیم کو 1-0 سے فتح دلائی تھی۔اسٹیڈیم میں میسی کا استقبال اس وقت تلخ یاد میں بدل گیا جب وہ بمشکل 22 منٹ تک ہی میدان میں موجود رہے جبکہ منتظمین نے وعدہ کیا تھا کہ وہ ایک گھنٹے سے زیادہ وقت وہاں گزاریں گے۔ میسی صبح تقریباً 11:30 بجے ایک سفید آڈی میں اسٹیڈیم پہنچے اور 11:52 بجے روانہ ہو گئے۔ اس دوران وہ سخت سکیورٹی اور اعلیٰ حکام، جن میں ریاست کے وزیرِ کھیل آروپ بسواس بھی شامل تھے، ان کے ساتھ تھے۔ شائقین نے ٹکٹوں کے لیے 4,000 روپے سے لے کر 18,000 روپے تک ادا کیے تھے اور پورے مغربی بنگال سمیت دیگر مقامات سے بھی لوگ اپنے پسندیدہ کھلاڑی کو دیکھنے آئے تھے، مگر افسوس کہ وہ اس فٹبال لیجنڈ کی ایک ٹھیک سے جھلک بھی نہ دیکھ سکے۔اس سے ان کے مداح ناراض ہو گئے۔ مشتعل حامیوں نے کرسیاں توڑ دیں، فائبر گلاس سیٹوں کو پھاڑ ڈالا اور پلاسٹک کی پانی کی بوتلیں اور دیگر اشیاء اتھلیٹک ٹریک پر پھینکنے لگے۔ منتظمین اور سکیورٹی اہلکاروں کو بدسلوکی کا نشانہ بنایا گیا۔میسی کو اسٹیڈیم میں اعزاز سے نوازا جانا تھا اور مداحوں سے بات چیت کرنی تھی، جس میں مغربی بنگال کی وزیر اعلیٰ ممتا بنرجی، بالی ووڈ اسٹار شاہ رخ خان اور سابق بھارتی کرکٹ کپتان سورو گنگولی کی بھی شرکت متوقع تھی۔ میسی 70 فٹ کے مجسمے کی نقاب کشائی بھی کرنے والے تھے، لیکن اس اقدام نے کچھ مداحوں کو مایوس کیا جو ان کی موجودگی کی امید کر رہے تھے۔