جعلی QR کوڈ کے ذریعے بڑی رقم غائب
ہمایوں کبیر نے سائبر کرائم میں شکایت درج کرائی
مرشد آباد: بابری مسجد ٹرسٹ کے نام پر دیے گئے عطیات دھوکہ بازوں کے کھاتوں میں چلے گئے، یہ چونکا دینے والا انکشاف سامنے آتے ہی بہرام پور کے ایم ایل اے ہمایوں کبیر نے بھرت پور سائبر کرائم پولیس اسٹیشن میں فوری شکایت درج کروائی اور پولیس نے معاملے کی حساسیت کے پیش نظر تحقیقات شروع بھی کر دی ہیں۔ بابری ٹرسٹ کو ملک اور بیرون ملک سے لاکھوں لوگ عطیہ دے چکے ہیں، اسی دوران جعلسازوں نے موقع کا فائدہ اٹھاتے ہوئے ٹرسٹ کی معلومات کو ہُو بہُو کاپی کرکے جعلی QR کوڈ بنا لیا اور عطیہ دہندگان کو گمراہ کرکے ان کا پیسہ اپنے اکاؤنٹس میں منتقل کرتے رہے۔ مغربی بنگال اسلامک فاؤنڈیشن آف انڈیا کے خزانچی محمد امین شیخ نے دعویٰ کیا ہے کہ دھوکہ باز ٹرسٹ کے نام اور اس کی ساکھ کو استعمال کرکے بڑے پیمانے پر فراڈ کر رہے تھے، اور جیسے ہی اس کا علم ٹرسٹ اور ایم ایل اے کو ہوا، انہوں نے فوراً کارروائی کی۔ دوسری طرف ہمایوں کبیر پچھلے کچھ دنوں سے لگاتار تنازعات میں گھرے ہوئے ہیں۔ بیلڈانگہ میں بابری مسجد یا مندر کے سنگ بنیاد کی تاریخ کا اعلان کرنے پر بی جے پی نے انہیں مذہب کی سیاست کرنے کا الزام دیا، ترنمول کانگریس نے بھی پارٹی مخالف سرگرمیوں کے نام پر انہیں معطل کر دیا، اماموں کی آمد اور باؤنسرز کی تعیناتی سے متعلق ان کے بیانات پر بھی سوال اٹھے، جس کے بعد ان پر طرح طرح کے تنازعات جڑتے گئے۔
ہمایوں کبیر کا کہنا ہے کہ ایک سازش کے تحت ان کے خلاف غلط فہمیاں پھیلائی جا رہی ہیں، ان کے مطابق “میں کھا کر پیسے کھو رہا ہوں، میری ساکھ خراب کرنے کی کوشش ہو رہی ہے لیکن حقیقت جلد سامنے آ جائے گی”۔ ادھر پولیس جعلسازی کے اس پورے نیٹ ورک کی گہرائی سے تحقیقات کر رہی ہے اور یہ معاملہ عوامی اعتماد، عطیہ دہندگان کی محنت کی کمائی اور ٹرسٹ کے تقدس سے جڑا ہونے کے باعث پورے علاقے کی توجہ کا مرکز بنا ہوا ہے۔
