نئی سمت دینے کی کوشش
جدید بھارت نیوز سروس
کولکاتہ،6دسمبر:مغربی بنگال کے سابق چیف سکریٹری اور متعدد اہم محکموں کی قیادت کرنے والے راجیو سنہا اب اپنی دہائیوں پر مشتمل انتظامی تجربے کو کاروباری دنیا کی رہنمائی کے لیے استعمال کر رہے ہیں۔ ریٹائرمنٹ کے بعد انہوں نے ’’راجیو سنہا فاؤنڈیشن‘‘ قائم کی، جو ایک آزاد اور غیر منافع بخش تھنک ٹینک ہے۔ اس فاؤنڈیشن کے ذریعے وہ نوجوان اور تجربہ کار کاروباریوں کو نئے کاروبار شروع کرنے، اپنے منصوبوں کو وسعت دینے اور حکومتی قوانین و ضوابط کو بہتر طور پر سمجھنے میں عملی مدد فراہم کر رہے ہیں۔ سنہا کے مطابق وہ فاؤنڈیشن میں آنے والوں کے مسائل خود سنتے ہیں اور ان کی ضرورت کے مطابق رہنمائی فراہم کرتے ہیں، جبکہ فاؤنڈیشن کی ویب سائٹ پر بھی اہم معلومات مسلسل جاری کی جاتی ہیں۔ کامیاب کاروبار کے راز بتاتے ہوئے سنہا نے کہا کہ کسی بھی بزنس کی بنیاد چار اصولوں پر رکھی جاتی ہے، محنت، واضح سوچ، یکسوئی اور جذبہ۔ انہوں نے کہا کہ کاروباری افراد کو سب سے پہلے یہ طے کرنا چاہیے کہ وہ کس شعبے میں کام کرنا چاہتے ہیں، اور زراعت، زرعی مصنوعات، جوٹ، چمڑا اور پولٹری جیسے شعبوں میں وہ اکثر خصوصی مشورے دیتے ہیں۔ ان کا کہنا ہے کہ پراجیکٹ رپورٹ اس انداز میں تیار ہونی چاہیے کہ بینک یا مالیاتی اداروں سے قرض حاصل کرنا آسان ہو جائے۔ نئے کاروبار شروع کرنے والوں کے لیے سنہا نے ’’ٹائیگرز پیچ‘‘ نامی ایک خصوصی ریئلٹی شو کا بھی ذکر کیا، جو آئی آئی ایم سی انوویشن پارک کے اشتراک سے منعقد کیا جا رہا ہے۔ درخواستیں 31 دسمبر تک قبول کی جائیں گی اور 30 بہترین شرکاء کا انتخاب کیا جائے گا، جنہیں اپنے کاروباری خیال پیش کرنے اور آگے بڑھنے کا موقع ملے گا۔
بنگال کی صنعتی ترقی پر بات کرتے ہوئے سنہا نے کہا کہ ریاست ایک مستحکم رفتار سے آگے بڑھ رہی ہے، جبکہ نئے ٹیرف اگرچہ برآمداتی شعبے کے لیے چیلنج ہیں لیکن مقامی مارکیٹ مضبوط ہے۔ انہوں نے کہا کہ بنگال کو جغرافیائی فائدہ، سیاسی استحکام اور بہتر امن و امان حاصل ہے، جو اسے صنعت کے لیے ایک محفوظ اور قابل اعتماد مقام بناتا ہے۔ سنہا نے زور دیا کہ سرکاری محکمے اگر مزید فعال انداز میں کام کریں تو کاروباری ماحول اور صنعت دونوں میں مزید تیزی آ سکتی ہے۔ مجموعی طور پر بنگال میں بڑھتا ہوا صنعتی ماحول، نئے مواقع، بہتر حکومتی سپورٹ اور تجربہ کار رہنمائی ریاست کو تیز رفتار ترقی کی نئی راہ پر لے جا رہے ہیں۔
