جدید بھارت نیوز سروس
پٹنہ،2 دسمبر:بہار میں اسمبلی انتخابات کے بعد حال ہی میں نئی حکومت تشکیل ہوئی ہے جس سے امید کی جا رہی تھی کہ حالات کچھ بہتر ہو سکتے ہیں مگر سسٹم میں براجمان لوگ سدھرنے کو تیار نہیں ہیں۔ ریاست کے کشن گنج میں رشوت ستانی سے متعلق ایک تازہ معاملہ سامنے آیا ہے جس میں منگل کے روز ویجیلنس ٹیم نے ریونیو ملازم راجدیپ پاسوان کو 2.50 لاکھ روپے رشوت لیتے ہوئے رنگے ہاتھ گرفتار کیا۔ کشن گنج میں اس کارروائی سے محکمہ کے دیگر ملازمین میں کھلبلی مچ گئی ہے۔بتایا جاتا ہے کہ کھگڑا کے رہنے والے اویس انصاری نے ویجیلنس ڈپارٹمنٹ کی ٹیم سے شکایت کی تھی کہ ریونیو ملازم راجدیپ پاسوان زمین کے سروے کے نام پر2.50 لاکھ روپے کا مطالبہ کر رہا ہے۔ جانچ کے بعد ویجیلنس ٹیم نے معاملہ صحیح پایا۔ اس کے بعد منگل کو منصوبہ بندی کے تحت کارروائی عمل میں لائی گئی۔ویجیلنس ٹیم نے راجدیپ پاسوان کو بلاک آفس کے قریب واقع ایک ہوٹل میں رشوت لیتے ہوئے رنگے ہاتھ گرفتار کرلیا۔ اس پورے معاملے میں ویجیلنس کے ڈی ایس پی ونود کمار نے بتایا کہ اویس انصاری نے شکایت درج کرائی تھی۔ جس کے بعد 7 رکنی ٹیم نے آج (منگل) کارروائی کی اور راجدیپ پاسوان کو رنگے ہاتھ گرفتار کرلیا۔ فی الحال ویجیلنس ٹیم رشوت لینے والے ملازم کو پٹنہ لے جانے کی تیاری کر رہی ہے۔
بہار: کشن گنج میں ریونیو ملازم 2.50 لاکھ روپے رشوت لیتے ہوئے رنگے ہاتھ گرفتار
