نئی دہلی، 15 نومبر (یو این آئی) سینیئر ویمنز انٹرزونل ٹی 20 ٹرافی 2025 کے فائنل میں جمعہ کے روز ویسٹ زون نے نارتھ زون کو 25 رنز سے شکست دے کر پہلا خطاب اپنے نام کر لیا۔ یہ مقابلہ ناگالینڈ کرکٹ ایسوسی ایشن اسٹیڈیم، سوویما میں کھیلا گیا۔یہ ویسٹ زون کا گھریلو خواتین ٹی 20 کرکٹ میں پہلا انٹرزونل خطاب تھا۔ اس سے قبل کے دونوں ایڈیشن میں وہ بالترتیب سینٹرل زون اور ایسٹ زون کے بعد رنر اپ رہی تھی۔کپتان تانیا بھاٹیہ کی قیادت میں نارتھ زون نے ٹاس جیت کر پہلے گیند بازی کا فیصلہ کیا۔ حمیرا قاضی کی شاندار نصف سنچری کی بدولت ویسٹ زون نے مقررہ 20 اوورز میں 4 وکٹ پر 169 رنز بنائے۔ جواب میں نارتھ زون کی ٹیم 20 اوورز میں ہدف حاصل نہ کر سکی اور 4 وکٹوں کے نقصان پر 144 رنز تک محدود رہی۔ویسٹ زون نے اننگز کا آغاز عمدہ انداز میں کیا۔ سلامی بلے باز قاضی اور کرن نوگ رے نے بہترین شراکت قائم کی۔ کے پی نوگ رے 245 رنز کے ساتھ ٹورنامنٹ کی سرِ فہرست اسکورر رہیں۔ چھٹے اوور میں ویسٹ زون کو پہلا نقصان اُس وقت ہوا جب اماندیپ کور نے کرن کو آؤٹ کیا۔ کرن نے 18 گیندوں پر 34 رنز بنائے جن میں چار چوکے اور دو چھکے شامل تھے۔اس کے بعد حمیرا قاضی کے ساتھ تیجل حسبنس نے اننگز کو آگے بڑھایا اور دونوں نے دوسرے وکٹ کے لیے 77 رنز کی اہم شراکت قائم کی۔پندرھویں اوور میں حمیرا کو نجمہ خان نے آؤٹ کیا۔ انہوں نے جارحانہ نصف سنچری اسکور کی اور 44 گیندوں پر آٹھ چوکوں اور ایک چھکے کی مدد سے 58 رنز بنائے۔بعد ازاں تِیجل بھی زیادہ دیر وکٹ پر نہ ٹک سکیں اور اٹھارہویں اوور میں نجمہ نے انہیں بھی آؤٹ کیا۔ تِیجل نے 35 گیندوں پر 43 رنز بنائے جن میں تین چوکے اور ایک چھکا شامل تھا۔پونم کھیم نار 10 رنز بنا کر رن آؤٹ ہوئیں۔ جب کہ انوجا پاٹل نے 15 گیندوں پر دو چوکوں کی مدد سے 22 رنز کی ناقابلِ شکست اننگز کھیلی۔ اس طرح ویسٹ زون نے 20 اوورز میں نارتھ زون کو 170 رنز کا ہدف دیا۔نجمہ خان، جو سینٹرل زون کی وشناوی شرما کے ساتھ ٹورنامنٹ کی مشترکہ ٹاپ اسکورر رہیں، نے نارتھ زون کے لیے دو وکٹیں حاصل کیں اور ٹورنامنٹ میں اپنے 12 وکٹ مکمل کیے۔نارتھ زون کی اننگز کا آغاز سست رہا اور دوسرے اوور میں ہی دیا یادو (10) آؤٹ ہو گئیں۔ اس کے بعد اوپنر شویتا سہراوت نے اننگز آگے بڑھانے کی کوشش کی، لیکن ساتویں اوور میں انوجا پاٹل نے انہیں بھی آؤٹ کر دیا۔ شویتا نے 24 گیندوں پر چار چوکوں اور ایک چھکے کی مدد سے 28 رنز بنائے۔کپتان تانیا اور آیوشی سونی نے اہم شراکت قائم کر کے اسکور میں اضافہ کیا۔ سولھویں اوور میں تانیا 25 رنز بنا کر آؤٹ ہوئیں۔ آیوشی نے جارحانہ نصف سنچری اسکور کی، مگر ان کی تیز اننگز بھی ٹیم کو شکست سے نہ بچا سکی اور نارتھ زون کو 25 رنز سے ناکامی کا سامنا کرنا پڑا۔آیوشی نے 40 گیندوں پر چھ چوکوں کی مدد سے 53 رنز کی ناقابلِ شکست اننگز کھیلی، جبکہ نجمہ خان نے بھی ناٹ آؤٹ 18 رنز بنائے۔ نارتھ زون نے 20 اوور میں 4 وکٹ پر 144 رنز بنائے۔اس سے قبل نارتھ زون نے چار فتوحات اور ایک بے نتیجہ مقابلے کے ساتھ گروپ میں پہلی پوزیشن حاصل کی تھی۔ ویسٹ زون تین فتوحات اور ایک شکست کے ساتھ دوسرے نمبر پر رہی اور فائنل کے لیے کوالیفائی کیا۔ ان کی واحد شکست گروپ کے آخری میچ میں سینٹرل زون کے خلاف ہوئی تھی۔
دلچسپ طور پر سوویما گراؤنڈ میں دونوں ٹیموں کے درمیان گروپ مرحلے کا میچ بارش اور خراب میدان کے باعث منسوخ کر دیا گیا تھا۔یہ ٹورنامنٹ بھارتی کرکٹ کنٹرول بورڈ (بی سی سی آئی) کے زیرِ اہتمام منعقد ہوا، جس میں چھ علاقائی ٹیموں — نارتھ زون، ساؤتھ زون، ایسٹ زون، ویسٹ زون، سینٹرل زون اور نارتھ ایسٹ زون نے شرکت کی۔ تمام ٹیموں نے راؤنڈ رابن فارمیٹ میں ایک دوسرے کے خلاف میچ کھیلے، جس کے بعد دو سرفہرست ٹیمیں فائنل میں پہنچیں۔
ویسٹ زون نے نارتھ زون کو شکست دے کر خطاب جیت لیا
