رانچی میں چاول کے مِلوں کے رجسٹریشن کا عمل شروع؛ 30 اکتوبر آخری تاریخ
جدید بھارت نیوز سروس
رانچی، 19 اکتوبر:۔ رانچی ضلع کے تمام چاول مل مالکان (ملرز) کو 30 اکتوبر دوپہر 3 بجے تک رجسٹریشن کے لیے درخواست دینا ہوگا۔ درخواستیں ضلع کلکٹریٹ کی پانچویں منزل، کمرہ نمبر 504 میں جمع کرائی جائیں گی۔خریداری مراکز پر کسانوں کے لیے مکمل سہولیات دستیاب ہوں گی، جن میں صاف صفائی، دھان کی چھنٹائی، وزن کرنے کی مشین، بوریاں، پینے کا پانی، بیٹھنے کی جگہ، سایہ دار جگہ، ابتدائی طبی امداد اور دیگر سہولیات شامل ہیں۔
دھان کی ریکارڈ توڑ پیداوار
رواں سال کسانوں نے حکومت کے مقررہ اہداف سے بھی زیادہ دھان کی بمپر پیداوار کی ہے۔ اچھی بارش کے سبب کھیتوں میں فصلیں خوب لہلہا رہی ہیں۔ خاص طور پر کانکے، راتو، مانڈر، چانھو، اورمانجی، بیڑو، اٹکی، نامکم، سلی، سوناہاتو، بونڈو اور تمار جیسے علاقوں میں فصل بہترین ہوئی ہے۔
رجسٹریشن میں درکار معلومات
ملرز کو رجسٹریشن فارم میں درج ذیل معلومات دینی ہوں گی:
- رائس مل کا نام
- مل مالک کا نام
- موبائل نمبر اور ای میل آئی ڈی
- مل کی ملنگ (چاول نکالنے) کی صلاحیت
- اسٹوریج کیپسٹی
- مرکزی گیٹ پر CCTV کی موجودگی
- CCTV میں ایک ماہ کی ویڈیو ریکارڈنگ کی سہولت
- آیا مل پر کوئی سابقہ واجب الادا رقم ہے یا نہیں
- مل میں بلینڈنگ مشین موجود ہے یا نہیں
ان معلومات کی بنیاد پر ہر مل کو اس کی صلاحیت کے مطابق خریداری مراکز سے منسلک کیا جائے گا۔
ریاست میں دھان کی خریداری کا آغاز یکم دسمبر سے
رانچی سمیت جھارکھنڈ کے دیگر اضلاع میں دھان کی خریداری کا آغاز یکم دسمبر سے کیا جائے گا۔ اس کے لیے خریداری مراکز کے انتخاب اور ملرز کے رجسٹریشن کا عمل جلد مکمل کیا جائے گا۔ ریاستی زرعی ڈائریکٹوریٹ کے مطابق، اس بار اگرچہ دھان کی پیداوار میں زبردست اضافہ ہوا ہے، لیکن دالیں، تیل والی بیج، مکئی اور دیگر موٹے اناج کی کاشت طے شدہ ہدف سے کہیں کم رہی ہے۔
