دفاتر میں حاضری، صفائی، عوامی سہولیات اور بدعنوانی کے خلاف سخت ہدایات دی
جدید بھارت نیوز سروس
رانچی، 4 اکتوبر:۔ رانچی کے ڈپٹی کمشنر منجوناتھ بھجنتری نے آج کلکٹریٹ کی عمارت (بلاک اے اور بلاک بی) کا اچانک معائنہ کیا۔ ان کے ہمراہ صدر سب ڈویژنل افسر اتکرش کمار، ایڈیشنل کلکٹر رام نارائن سنگھ، ایڈیشنل ڈسٹرکٹ مجسٹریٹ (لا اینڈ آرڈر) راجیشور ناتھ آلوک اور دیگر سینئر افسران بھی موجود تھے۔معائنہ کے دوران ڈپٹی کمشنر نے مختلف محکموں کا جائزہ لیا، جن میں ڈسٹرکٹ سپلائی آفس، پبلک ریلیشن آفس، سوشل ویلفیئر ڈیپارٹمنٹ، ویلفیئر آفس، اسپیشل ایلوکیشن آفس اور ٹریژری آفس شامل ہیں۔ دیگر سینئر ضلعی افسران نے باقی دفاتر کا معائنہ کیا۔ڈپٹی کمشنر نے ملازمین کی حاضری رجسٹر اور بایومیٹرک ریکارڈ کا معائنہ کیا۔ انہوں نے تمام ملازمین کو سختی سے ہدایت کی کہ وہ وقت کی پابندی کریں اور دلجمعی کے ساتھ اپنے فرائض انجام دیں۔ انہوں نے ہر ملازم پر زور دیا کہ وہ اپنی ذمہ داریوں کو سنجیدگی سے ادا کریں تاکہ عوام کو بہتر خدمات فراہم کی جا سکیں۔مسٹر بھجنتری نے واضح الفاظ میں کہا کہ اگر کسی ملازم کے خلاف بدعنوانی کی شکایت موصول ہوتی ہے اور الزامات ثابت ہوتے ہیں تو فوری کارروائی کی جائے گی۔ انہوں نے مزید کہا کہ عوام کے مسائل کو سنجیدگی اور خوش اخلاقی کے ساتھ سنا جائے۔ڈپٹی کمشنر نے کہا کہ ضلع انتظامیہ رانچی کو ریاست کا بہترین ضلع بنانے کے لیے پرعزم ہے۔ انہوں نے تمام ملازمین سے اپیل کی کہ وہ کارکردگی، شفافیت اور عوامی خدمت کو اپنی ترجیح بنائیں۔معائنہ کے دوران ڈپٹی کمشنر نے ڈسٹرکٹ ٹرانسپورٹ آفیسر کو کلکٹریٹ کے احاطے میں “نو پارکنگ زون” میں کھڑی متعدد گاڑیوں کے چالان جاری کرنے کی ہدایت دی، جس پر فوری کارروائی کی گئی۔ڈپٹی کمشنر نے کلکٹریٹ کے احاطے میں صفائی، پارکنگ کی سہولیات، پینے کے پانی اور زائرین کے بیٹھنے کے انتظامات کو بہتر بنانے کی بھی ہدایت دی۔ انہوں نے کہا کہ کلکٹریٹ آنے والے شہریوں کو بہتر سہولیات اور صاف ستھرا ماحول فراہم کیا جانا چاہیے۔
