مرکزی تفتیشی ایجنسی انفورسمنٹ ڈائریکٹوریٹ (ای ڈی) نے آر جے ڈی سربراہ اور بہار کے سابق وزیر اعلی لالو پرساد یادو اور ان کے بیٹے اور ریاست کے نائب وزیر اعلی تیجسوی یادو کے خلاف زمین کے بدلے نوکری گھوٹالہ میں بڑی کارروائی کی ہے۔ ای ڈی نے لالو اور تیجسوی کو سمن بھیجا ہے اور انہیں پوچھ گچھ کے لیے ای ڈی ہیڈکوارٹر بلایا ہے۔ ای ڈی نے تیجسوی یادو کو جمعہ (22 دسمبر) کو پوچھ گچھ کے لیے حاضر ہونے کو کہا ہے۔ بہار کے سابق وزیر اعلی لالو یادو کو بدھ (27 دسمبر) کو اس معاملے میں سوالات کا جواب دینے کے لیے بلایا گیا ہے۔ آپ کو بتاتے چلیں کہ بہار کے سابق وزیر اعلی اور آر جے ڈی سپریمو لالو پرساد یادو، سابق وزیر اعلیٰ رابڑی دیوی اور تیجسوی یادو کو نوکری کے بدلے زمین گھوٹالہ میں ملزم بنایا گیا ہے۔
اس سے پہلے آج، بدھ کو دہلی کی راؤس ایونیو کورٹ نے لالو پرساد یادو، رابڑی دیوی اور تیجسوی یادو اور دیگر ملزمان کی طرف سے دائر درخواست پر سماعت کی۔ اس دوران عدالت نے درخواست پر سی بی آئی سے جواب طلب کیا ہے۔ درخواست میں چارج شیٹ کے ساتھ داخل دستاویزات کی فراہمی کا مطالبہ کیا گیا تھا۔
