:ریاستی کمیٹی کا اعلان درگا پوجا سے پہلے متوقع
کولکاتا: اسمبلی انتخابات سے قبل مغربی بنگال بی جے پی نے سالٹ لیک کے ایک فائیو اسٹار ہوٹل میں میراتھن میٹنگ منعقد کی، جس میں پارٹی کے اعلیٰ رہنما اور آر ایس ایس کے سینئر عہدیدار شریک ہوئے۔ بی جے پی کے جنرل سکریٹری (تنظیم) بی ایل سنتوش نے انفرادی اور اجتماعی طور پر لیڈروں سے مشاورت کی، تاکہ ریاستی کمیٹی کی تشکیل پر حتمی فیصلہ کیا جا سکے۔
میٹنگ میں شوبھندوادھیکاری ادھیکاری، سکانتا مجومدار، شمک بھٹاچاریہ، امیت مالویہ، امیتابھ چکرورتی، جگن ناتھ چٹوپادھیائے، دیپک برمن اور دیگر بی جے پی رہنما شامل تھے۔ آر ایس ایس کے جشنو باسو، راما پادا پال، سچندرا ناتھ سنہا، پردیپ جوشی اور جلدھر مہتو نے بھی شرکت کی۔ سیاسی تجزیہ کاروں کا کہنا ہے کہ انتخابات سے چند ماہ قبل بی جے پی اور آر ایس ایس کی یہ مشترکہ میٹنگ پارٹی کی حکمت عملی اور مستقبل کی منصوبہ بندی کی اہم نشاندہی کرتی ہے۔ذرائع کے مطابق رات ہونے والے اجلاس میں بنیادی توجہ ریاستی کمیٹی کی تشکیل پر رہی۔ پارٹی طویل عرصے سے اس کمیٹی کے حوالے سے الجھن میں تھی، اور موجودہ ترجیح اسے فعال اور موثر بنانا ہے۔ اس سال وجے دشمی پر آر ایس ایس کی 100 ویں سالگرہ کے موقع پر مختلف پروگرام بھی زیر بحث آئے، جن کی منصوبہ بندی میٹنگ میں کی گئی۔بی جے پی-آر ایس ایس کی اس میٹنگ کا مقصد تال میل کو مضبوط کرنا اور آئندہ اسمبلی انتخابات میں اثر انداز ہونا ہے۔ اس ماہ کے شروع میں البیریا میں بھی تین روزہ کوآرڈینیشن میٹنگ ہوئی تھی، اور اب یہ اجلاس ایک بار پھر اہم سیاسی اشارہ سمجھا جا رہا ہے۔
میٹنگ میں SIR اور CAA پر بھی تفصیلی تبادلہ خیال ہوا۔ ذرائع کے مطابق ایس آئی آر کے نفاذ سے پہلے اور بعد کے حالات پر غور کیا گیا، اور سی اے اے پر بھی مخصوص بحث متوقع تھی۔ ملاقات کے بعد بی ایل سنتوش نے نئی ریاستی کمیٹی کو حتمی شکل دی، اور بتایا جا رہا ہے کہ اس کا اعلان درگا پوجا سے پہلے کیا جا سکتا ہے۔یہ میٹنگ واضح طور پر اس بات کی نشاندہی کرتی ہے کہ بی جے پی اور آر ایس ایس بنگال میں اپنی سیاسی حکمت عملی کو مضبوط کرنے کے لیے فعال ہو گئے ہیں، اور آنے والے انتخابات میں اپنی پوزیشن کو بہتر بنانے کے لیے اہم اقدامات کر رہے ہیں۔
