انتظامات میں کوتاہی برداشت نہیں ہوگی، تمام کام وقت پر مکمل کیے جائیں: منجوناتھ بھجنتری
جدید بھارت نیوز سروس
رانچی، 11 اگست:یومِ آزادی کی تقریبات کو شایانِ شان طریقے سے منانے کے لیے ڈپٹی کمشنر و ضلعی مجسٹریٹ رانچی، جناب منجوناتھ بھجنتری نے آج شام مورہابادی میدان میں جاری تیاریاں کا تفصیلی جائزہ لیا۔ انہوں نے مختلف انتظامات کا معائنہ کرتے ہوئے متعلقہ افسران کو ضروری ہدایات جاری کیں۔
تمام انتظامات کا تفصیلی جائزہ، معیار اور وقت کی پابندی پر زور
معائنے کے دوران ڈپٹی کمشنر نے مرکزی اسٹیج، پریڈ گراؤنڈ، معزز مہمانوں کی نشست، عام شہریوں کے بیٹھنے کے انتظامات، پینے کے پانی، روشنی، سجاوٹ، سیکیورٹی، پارکنگ، ٹریفک کنٹرول، طبی سہولیات اور ایمرجنسی خدمات کے انتظامات کا باریک بینی سے جائزہ لیا۔ انہوں نے ہدایت دی کہ تمام کام اعلیٰ معیار کے ساتھ مقررہ وقت میں مکمل کر لیے جائیں تاکہ یومِ آزادی کا جشن بغیر کسی رکاوٹ کے کامیابی سے مکمل ہو سکے۔
سیکیورٹی اور ٹریفک پلان کو مؤثر بنانے کی ہدایات
سیکیورٹی انتظامات کے سلسلے میں ڈپٹی کمشنر نے میدان کے اندر اور باہر مناسب تعداد میں پولیس اہلکار تعینات کرنے کی ہدایت دی۔ انہوں نے ٹریفک پولیس کو خاص ٹریفک پلان تیار کرنے، بھیڑ پر قابو پانے اور پارکنگ مقامات کو واضح طور پر نشان زد کرنے کی بھی ہدایت دی۔
صفائی مہم، پانی، بیت الخلا اور صحت کی سہولیات کی فراہمی پر زور
شہر کی صفائی پر زور دیتے ہوئے ڈپٹی کمشنر نے میونسپل کارپوریشن کے افسران کو خصوصی صفائی مہم، کچرے کی نکاسی، پانی کے ٹینکر، موبائل بیت الخلا اور لازمی طبی سہولیات مہیا کرانے کی ہدایت دی۔ انہوں نے میدان میں ایمبولینس اور ڈاکٹرز کی ٹیم کو مستعد رکھنے کی ہدایت بھی جاری کی۔
اعلیٰ افسران کی موجودگی، ٹیم ورک سے کامیابی کی توقع
اس موقع پر تقریب سے متعلق دیگر سرگرمیوں کا بھی جائزہ لیا گیا اور متعلقہ افسران کو ضروری ہدایات دی گئیں۔ معائنے کے دوران رانچی کے ڈپٹی ڈویلپمنٹ کمشنر سوربھ کمار بھوونیا، ایڈیشنل ڈسٹرکٹ مجسٹریٹ برائے لاء اینڈ آرڈر راجیشور ناتھ آلوک، سب ڈویژنل آفیسر اُتکرش کمار، پراجیکٹ ڈائریکٹر آئی ٹی ڈی اے سنجے کمار بھگت، سٹی سپرنٹنڈنٹ آف پولیس اجیت کمار، ضلعی اطلاعاتی افسرہ اروشی پانڈے سمیت پولیس و انتظامیہ کے دیگر متعلقہ افسران بھی موجود تھے۔
