صدر مرمو سے پی ایم مودی نے راشٹرپتی بھون میں ملاقات کی

نئی دہلی، 3 اگست:۔ (ایجنسی) وزیر اعظم نریندر مودی نے اتوار کو یہاں راشٹرپتی بھون میں صدر دروپدی مرمو سے ملاقات کی۔ راشٹرپتی بھون نے ایکس پر کہاکہ “وزیر اعظم @narendramodi نے صدر دروپدی مرمو سے راشٹرپتی بھون میں ملاقات کی۔ یہ میٹنگ بہار میں اسمبلی انتخابات سے قبل ریاست میں اسپیشل انٹینسیو ریویژن (ایس آئی آر) مشق پر بحث کرنے کے اپوزیشن کے مطالبے پر پارلیمنٹ میں جمود کے پس منظر میں ہوئی ہے۔ آپریشن سندور پر دونوں ایوانوں میں بحث کے علاوہ، 21 جولائی کو مانسون اجلاس شروع ہونے کے بعد سے پارلیمنٹ میں بہت کم کام دیکھنے میں آیا ہے۔ صدر کے ساتھ وزیر اعظم کی ملاقات، امریکی صدر ڈونلڈ ٹرمپ کی جانب سے بھارت سے برآمدات پر 25 فیصد محصولات اور نئی دہلی کی طرف سے روسی فوجی سازوسامان اور تیل کی خریداری کی وجہ سے غیر متعینہ جرمانے کے اعلان کے چند دن بعد ہوئی ہے۔ آخری بار وزیر اعظم نے صدر مرمو سے 7 مئی کو ملاقات کی تھی جب انہوں نے پاکستان اور پاک مقبوضہ کشمیر میں بھارت کی طرف سے نو دہشت گردی کے ڈھانچوں کو نشانہ بنانے کے چند گھنٹے بعد انہیں آپریشن سندور کے بارے میں بتایا تھا۔ یہ آپریشن 22 اپریل کو پہلگام میں ہونے والے دہشت گردانہ حملے کے جواب میں بھارت کا جوابی حملہ تھا۔ اتوار کی میٹنگ جگدیپ دھنکھر کے نائب صدر کے عہدے سے استعفیٰ دینے کے چند دن بعد بھی ہوئی ہے، جبکہ ان کی میعاد ختم ہونے میں ابھی دو سال باقی تھے۔