تعلیم کو صرف ذاتی ترقی تک محدود نہ رکھیں، اسے قوم کی خدمت کے لیے استعمال کریں: مرمو
جدید بھارت نیوز سروس
دھنباد، یکم اگست:۔ صدر جمہوریہ دروپدی مرمو دھنباد بروا اڈا ایئرپورٹ پہنچیں۔ یہاں سے وہ سیدھے آئی آئی ٹی-آئی ایس ایم کے لیے روانہ ہو گئیں۔ آج آئی آئی ٹی-آئی ایس ایم، دھنباد کا 45 واں جلسۂ تقسیم اسناد (دیکشانت سماروہ) منعقد ہو رہا ہے، جس میں شرکت کے لیے صدر جمہوریہ دھنباد پہنچی ہیں۔ صدر جمہوریہ دروپدی مرمو نے آئی آئی ٹی-آئی ایس ایم دھنباد کے جلسہ تقسیم اسناد سے طلباء کو خطاب کرتے ہوئے کہا کہ یہ موقع ان کی محنت، جدوجہد اور کامیابیوں کا اعتراف و احترام ہے۔ انہوں نے تمام ڈگری اور تمغہ حاصل کرنے والے طلباء کو مبارکباد دی اور کہا کہ جلسۂ تقسیم اسناد زندگی کے ایک نئے باب کے آغاز کی علامت ہوتا ہے۔ صدر جمہوریہ نے طلباء سے اپیل کی کہ وہ اپنی تعلیم اور مہارت کا استعمال معاشرہ، ملک اور دنیا کے مسائل کے حل کے لیے کریں۔
جلسہ تقسیم اسناد: نئی زندگی کی شروعات
صدر جمہوریہ نے کہا:”آج کا دن آئی آئی ٹی-آئی ایس ایم کے طلباء کے لیے خاص طور پر اہم ہے۔ آپ ایک عالمی معیار کے ادارے سے تعلیم حاصل کر کے دنیا میں مثبت تبدیلی لانے کے لیے تیار ہیں۔ یہ سفر نوکری، اعلیٰ تعلیم، جدت طرازی یا کاروبار کی سمت میں ہو سکتا ہے۔”انہوں نے طلباء، ان کے والدین، اساتذہ اور رہنماؤں کو بھی مبارکباد دی جنہوں نے اس سفر میں ان کا ساتھ دیا۔
آئی آئی ٹی-آئی ایس ایم کی شاندار وراثت
صدر جمہوریہ نے آئی آئی ٹی-آئی ایس ایم کی سو سالہ شاندار وراثت کی تعریف کی۔ انہوں نے کہا:”یہ ادارہ کان کنی اور ارضیات کے شعبے میں ماہرین تیار کرنے کے مقصد سے قائم کیا گیا تھا۔ وقت کے ساتھ اس نے اپنے تعلیمی دائرہ کو وسیع کرتے ہوئے اعلیٰ تعلیم اور تحقیق کا ممتاز مرکز بننے کا اعزاز حاصل کیا ہے۔”انہوں نے تکنیکی ترقی اور اختراعات (Innovation) میں ادارے کے کردار کو بھی اجاگر کیا۔
قبائلی بااختیاری اور خواتین کی ترقی کی کوششیں
صدر جمہوریہ نے آئی آئی ٹی-آئی ایس ایم میں قبائلی برادری کی ترقی کے لیے کام کرنے والے سینٹر آف ایکسی لینس کی ستائش کی۔ یہ مرکز ایکلویہ ماڈل رہائشی اسکول، ڈیجیٹل خواندگی، مہارت سازی اور روزگار پر مبنی تربیت کے ذریعہ جھارکھنڈ کے قبائلی نوجوانوں کو بااختیار بنا رہا ہے۔انہوں نے ادارے کے فاؤنڈیشن اسکل ڈیولپمنٹ پروگرام کی بھی تعریف کی، جو پسماندہ طبقے کی خواتین کی معاشی اور سماجی حالت کو بہتر بنانے کے لیے کام کر رہا ہے۔
جامع ترقی میں آئی آئی ٹی-آئی ایس ایم کا کردار
صدر جمہوریہ نے کہا کہ کسی بھی ملک کی ترقی تب ہی ممکن ہے جب اس کے تمام طبقات کی ترقی ہو۔ انہوں نے کہا کہ وہ آئی آئی ٹی-آئی ایس ایم سے نہ صرف اعلیٰ انجینئرز اور محققین کی توقع رکھتی ہیں بلکہ رحم دل، حساس اور مقصد پر مبنی پیشہ ور افراد کی بھی امید رکھتی ہیں۔انہوں نے کہا:”تحقیق اور اختراع کو فروغ دے کر آپ ملک کے مستقبل کو سنوار سکتے ہیں‘‘۔
موسمیاتی تبدیلی اور تکنیکی چیلنجز کے حل
صدر جمہوریہ نے موسمیاتی تبدیلی، وسائل کی کمی اور ڈیجیٹل عدم مساوات جیسے عالمی چیلنجز کا ذکر کرتے ہوئے کہا کہ آئی آئی ٹی-آئی ایس ایم جیسے ادارے ان مسائل کے پائیدار حل فراہم کرنے میں کلیدی کردار ادا کر سکتے ہیں۔انہوں نے بھارت کی تکنیکی ترقی اور آئی آئی ٹی اداروں کے اس میں کردار کی تعریف کی، جو معیاری تعلیم، تحقیق اور اسٹارٹ اپ کلچر کو فروغ دے رہے ہیں۔
طلباء کے لیے ترغیب: ہمدردی سے متاثر اختراع
صدر جمہوریہ نے طلباء سے کہا:”اپنے علم کو صرف ذاتی ترقی تک محدود نہ رکھیں، بلکہ اسے عوامی فلاح اور قوم کی تعمیر کے لیے استعمال کریں۔ ‘گرین انڈیا ‘ کے قیام میں اپنا کردار ادا کریں، جہاں ترقی فطرت کے ساتھ ہم آہنگ ہو کر ہو۔”انہوں نے زور دے کر کہا کہ اختراع صرف ذہانت سے نہیں، بلکہ ہمدردی اور اخلاقیات سے متاثر ہو کر ہونی چاہیے۔
