رانچی: آن لائن گیمبلنگ گینگ کے 14 افراد گرفتار

جدید بھارت نیوز سروس
رانچی، 18 جولائی:۔ رانچی پولیس نے 14 نوجوانوں کو آن لائن جوئے اور غیر قانونی گیمنگ ریکیٹ کو گرفتار کیا ہے۔ یہ تمام ملزم گذشتہ ایک ماہ سے بیریٹو ہاؤسنگ کالونی کے روڈ نمبر 2 میں واقع کرایے والے مکان میں رہ کر آن لائن گیمنگ چلارہے تھے۔ پولیس نے مختلف بینکوں سے پانچ لیپ ٹاپ ، 17 موبائل فون اور 90 اے ٹی ایم کارڈ برآمد کیے ہیں۔ ڈی آئی جی کم ایس ایس پی چندن سنہا نے جمعہ کو پریس کانفرنس کر کے اس کے بارے میں معلومات دی۔ ایس ایس پی نے بتایا کہ 17 جولائی کی رات کو خفیہ معلومات موصول ہوئی کہ بیریٹو ہاؤسنگ کالونی میں کچھ لوگ آن لائن گیمنگ اور دیگر غیر قانونی سرگرمیاں انجام دے رہے ہیں۔ اس کے بعد ایک ٹیم تشکیل دی گئی۔ اس ٹیم نے اس علاقے پر چھاپہ مارا اور ایک گھر سے 14 لڑکوں کو پکڑ لیا۔ تفتیش کے دوران ، لڑکوں نے بتایا کہ وہ پچھلے ایک ماہ سے اس گھر میں مقیم ہیں اور آن لائن گیمنگ چلارہے ہیں۔ اس نے یہ بھی بتایا کہ کچھ لوگ باہر سے ان کی رہنمائی کرتے تھے اور بعض اوقات ان سے ملنے آتے تھے۔ گرفتار لڑکوں کو اس کام کے لئے ہر ماہ 15،000 سے 20،000 روپے ملتے تھے۔