بھارت نے 2-3 سے سیریز اپنے نام کیا
برمنگھم، 13 جولائی (یو این آئی) شارلٹ ڈین (تین وکٹ) اور سوفی ایکلسٹن (دو وکٹ) کی شاندار گیندبازی کے بعد سوفیا ڈنکلی (46) اور ڈینیئل وائٹ (56) کی بہترین اننگز کی بدولت انگلینڈ کی خاتون ٹیم نے پانچویں ٹی-20 میچ میں ہندوستان کو پانچ وکٹوں سے شکست دی۔ اگرچہ ہندوستان نے سیریز 3-2 سے اپنے نام کر لی۔ یہ پہلا موقع ہے کہ ہندوستانی خاتون ٹیم نے انگلینڈ کی سرزمین پر ٹی-20 سیریز جیتی ہے۔168 رنز کے ہدف کا تعاقب کرتے ہوئے انگلینڈ کی جانب سے سوفیا ڈنکلی اور ڈینیئل وائٹ کی اوپننگ جوڑی نے سنچری کی شراکت داری قائم کر کے جیت کی بنیاد رکھی۔ گیارہویں اوور میں رادھا یادو نے 30 گیندوں پر 46 رنز بنانے والی ڈنکلی کو بولڈ کر کے پویلین بھیج دیا۔ اگلے ہی اوور میں دیپتی شرما نے 37 گیندوں پر 56 رنز بنانے والی وائٹ کو آؤٹ کر کے ہندوستان کی امیدوں کو زندہ رکھا۔ پھر 16ویں اوور میں دیپتی نے مایا بوچیر (16) کو آؤٹ کر کے انگلینڈ کو تیسرا دھچکا دیا۔اروندھتی ریڈی نے آخری اوور میں کپتان ٹیمی بیومنٹ (20 گیندوں پر 30 رنز) اور ایمی جونز (10 رنز) کو آؤٹ کر کے میچ کو دلچسپ بنا دیا۔ انگلینڈ کے بلے بازوں نے آخری دو گیندوں پر دو سنگل لے کر 168 رنز کا ہدف پورا کر کے ٹیم کو شاندار جیت دلا دی۔ رادھا یادو کا آخری اوور اور ان کا ایک اہم کیچ بار بار یاد کیا جائے گا کیونکہ انہوں نے دباؤ میں شاندار کارکردگی کا مظاہرہ کیا۔ اگرچہ ہندوستان یہ میچ ہار گیا لیکن سیریز 3-2 سے جیت لی۔میچ میں تین اہم وکٹ لینے والی شارلٹ ڈین کو ’پلیئر آف دی میچ‘ قرار دیا گیا۔ جبکہ سیریز میں 10 وکٹ لینے والی شری چارنی کو ’’پلیئر آف دی سیریز‘‘ کا اعزاز دیا گیا۔ہندوستان کی جانب سے اروندھتی ریڈی اور دیپتی شرما نے دو دو وکٹ حاصل کئے جبکہ رادھا یادو نے ایک کھلاڑی کو آؤٹ کیا۔اس سے پہلے انگلینڈ نے ٹاس جیت کر ہندوستان کو پہلے بیٹنگ کی دعوت دی۔ ہندوستانی ٹیم نے شیفالی ورما (75) اور رچا گھوش (24) کی شاندار اننگز کی بدولت 20 اوورز میں سات وکٹوں کے نقصان پر 167 رنز بنائے۔ ٹیم کی شروعات اچھی نہیں رہی اور ابتدائی دو وکٹ 19 کے اسکور پر گر گئے۔ اس کے بعد کپتان ہرمن پریت کور نے شیفالی ورما کے ساتھ مل کر اننگز کو سنبھالا اور دونوں کے درمیان 66 رنز کی شراکت ہوئی۔دسویں اوور میں شارلٹ ڈین نے ہرمن پریت کور (15) کو بولڈ کر کے اس شراکت داری کا خاتمہ کیا۔ ہرلین دیول (4) اور دیپتی شرما (7) رنز بنا کر آؤٹ ہو ئیں۔ شیفالی ورما نے 41 گیندوں پر 13 چوکے اور ایک چھکا لگا کر 74 رنز کی شاندار اننگز کھیلی اور انہیں شارلٹ ڈین نے آؤٹ کیا۔ رچا گھوش نے 16 گیندوں پر 24 رنز بنائے۔انگلینڈ کی جانب سے شارلٹ ڈین نے تین وکٹ اصل کئے، سوفی ایکلسٹن کو دو وکٹ ملے جبکہ ایمیلی آرلیٹ اور لنسی اسمتھ نے ایک ایک وکٹ لیا۔
