کسانوں میں بیداری سے ختم ہوگا بچولیوں کا راج: وزیر زراعت
جدید بھارت نیوز سروس
رانچی،25؍مئی: جھارکھنڈ میں 25 مئی سے بیج کی تقسیم دوبارہ شروع ہو گئی ہے۔ ڈائریکٹوریٹ آف ایگریکلچر کے احاطے میں یوم بیج پر منعقد پروگرام میں ریاستی وزیر زراعت، شلپی نیہا ترکی نے کسانوں میں بیجوں کی تقسیم کا افتتاح کیا۔ رواں مالی سال 26-2025 میں محکمہ نے خریف فصل کے 80 ہزار کوئنٹل بیج تقسیم کرنے کا ہدف مقرر کیا ہے۔ یہ تعداد پچھلے دو مالی سالوں کے مقابلے دوگنی ہے۔ اس موقع پر وزیر شلپی نیہا ترکی نے کہا کہ حکومت ریاست کے کسانوں سے کئے گئے وعدوں سے باخبر ہے۔ یہی وجہ ہے کہ یوم بیج کے دن سے ہی ریاست بھر میں بیج کی تقسیم شروع کردی گئی ہے۔ کمزور ریاستوں کو بہتر کارکردگی دکھانے کے لیے مزید محنت کرنے کی ضرورت ہے۔ جھارکھنڈ بھی اس راستے پر مسلسل آگے بڑھ رہا ہے۔ اگر کسانوں کو محکمہ کی اسکیموں کا علم ہو جائے تو ریاست سے مڈل مین کا خاتمہ ہو جائے گا۔ یہ کسانوں کی بیداری اور دانشمندی سے ہی ممکن ہے۔ انہوں نے کہا کہ محکمہ کسانوں کو 50 فیصد سے 100 فیصد تک سبسڈی پر بیج فراہم کر رہا ہے۔ لیکن اس سے فائدہ اٹھانے کے لیے صحیح وقت پر درست معلومات اور عمل کو اپنانا ہوگا۔ زراعت، حیوانات اور تعاون کا محکمہ ضلع سے لے کر بلاک سطح تک کسانوں سے اسکیموں کا فیڈ بیک لے رہا ہے، تاکہ کوتاہیوں کو بروقت دور کیا جاسکے۔ ریاست میں چھوٹی چھوٹی تبدیلیوں سے ایک ترقی یافتہ جھارکھنڈ کی تشکیل ممکن ہے۔ فصلوں کی آبپاشی کے لیے محکمہ نے ندی پر برسا پکا چیک ڈیم اسکیم شروع کرنے کا فیصلہ کیا ہے۔ ۔ وزیر شلپی نیہا ترکی نے کہا کہ محکمہ کسانوں کی سہولت کے مطابق اسکیم تیار کرنا چاہتا ہے۔ یہ ضروری ہے کہ کسان بیدار ہوں اور محکمہ کی اسکیموں کے بارے میں معلومات گاؤں کے ہر فرد کے ساتھ شیئر کریں۔ ایسا کرنے سے جھارکھنڈ کے کسان بھی کیرالہ اور مہاراشٹر کی طرح زراعت کے میدان میں خود کو کامیاب ثابت کر سکتے ہیں۔ انہوں نے کہا کہ آج جدیدیت کے دور میں کسانوں کو سائنس اور علم کو اپنانا ہو گا۔ زراعت کے میدان میں ٹیکنالوجی کی ترقی سے فصل کی پیداوار میں اضافہ یقینی ہے۔ اس موقع پر محکمہ جاتی سکریٹری ابوبکر صدیقی نے کسانوں کو خبردار کیا کہ وہ غلطی سے بھی بیج خریدنے پر اپنا OTP کسی کے ساتھ شیئر نہ کریں۔ آپ ایک غلطی سے خود کو نقصان پہنچا سکتے ہیں۔ بیج کی تقسیم کے لیے بلاک کی سطح پر ایک مانیٹرنگ ٹیم تشکیل دی گئی ہے۔ یہی نہیں محکمہ نے بلاک چین سسٹم بھی تیار کیا ہے۔ اس کا مقصد کسانوں کو وقت پر ان کی مانگ کے مطابق بیج فراہم کرنا ہے۔ زراعت کے ڈائریکٹر تاراچند نے کہا کہ جھارکھنڈ کی 80 فیصد آبادی زراعت اور کھیتی باڑی سے وابستہ ہے۔ خریف کی فصل کو ریاست میں اہم فصل کے طور پر جانا جاتا ہے۔ اس سال 5 سرکاری کمپنیوں کو بیج فراہم کرنے کا کام دیا گیا ہے تاکہ پوری ریاست میں بیج کی تقسیم ایک ساتھ شروع ہوسکے۔ یوم بیج کے موقع پر، راتو، بڑھمو، کانکے، مانڈر ، چانہو اور اورمانجھی بلاکس کے دو کسانوں کو بیج دستیاب کرائے گئے۔ وزیر شلپی نیہا ترکی نے بھی فیتہ کاٹ کر ایگریکلچر ڈائریکٹوریٹ میں تزئین و آرائش کے بعد تیار کیے گئے کانفرنس ہال کا افتتاح کیا۔
