لڑکیوں کو کوڈنگ، سائبر سیکیورٹی اور قیادت کیلئے بااختیار بنا کر محفوظ ڈیجیٹل مستقبل کی جانب ایک قدم
نئی دہلی، 25 اپریل (پریس ریلیز) انموبی ، سائبر پیس اور جامعہ ہمدرد نے آج بین الاقوامی یومِ لڑکیاں برائے ICT 2025 کے موقع پر جامعہ ہمدرد میں ’سائبر شیروز‘ پروگرام کا باضابطہ آغاز کیا۔ “Girls in ICT: Code, Secure, Lead” کے عنوان سے منعقد ہونے والی اس بااثر کانفرنس میں علمی، انتظامی، اور صنعتی شعبوں سے تعلق رکھنے والی اہم شخصیات نے شرکت کی۔ اس موقع کا اہم پہلو ’سائبر شیروز‘ پروگرام کا افتتاح تھا، جو کہ انموبی اور Glance For Good کا ایک مشترکہ اقدام ہے۔ اس پروگرام کا مقصد لڑکیوں کو سائبر تحفظ، خطرات کی رپورٹنگ، ڈیجیٹل لچک، اور کمیونٹی رسائی جیسے اہم مہارتوں سے آراستہ کر کے ایک مضبوط سائبر محافظ برادری قائم کرنا ہے۔
جامعہ ہمدرد کے وائس چانسلر، پروفیسر (ڈاکٹر) ایم. افشار عالم نے کہا:
“ہمیں اس اہم دن پر ’سائبر شیروز‘ کے آغاز پر فخر ہے۔ ہماری بچیاں نہ صرف ڈیجیٹل نیٹیو ہیں بلکہ اب ڈیجیٹل محافظ بھی بنیں گی۔ یہ پہل انہیں سائبر سیکیورٹی میں قیادت کے لیے تیار کرتی ہے، اور ہم انموبی اور تمام شراکت داروں کے مشکور ہیں جنہوں نے اس تحریک کو ممکن بنایا۔”
’سائبر شیروز‘ پروگرام کی خالق، انموبی کی گلوبل سینئر وائس پریزیڈنٹ اور چیف کارپوریٹ افیئرز و پالیسی آفیسر ڈاکٹر سُبی چترویدی نے کہا:
“ڈیجیٹل دنیا کو محافظوں کی ضرورت ہے، اور ’سائبر شیروز‘ شمولیتی قیادت کی ایک بہترین مثال ہے۔ ہماری ذمہ داری ہے کہ ہر لڑکی نہ صرف آن لائن ہو بلکہ محفوظ، ماہر اور بااختیار ہو۔ یہ انموبی اور Glance For Good کا ایک جراتمند اور بروقت اقدام ہے جو بہت ضروری تھا۔” انہوں نے مزید کہا، “ہم جامعہ ہمدرد اور سائبر پیس کے ساتھ اس ملک گیر اثر انگیز اور دیرپا شراکت داری پر بہت خوش ہیں۔”
اس موقع پر دہلی-این سی آر کے مختلف اسکولوں اور کالجوں سے تعلق رکھنے والی 150 سے زائد طالبات نے ورکشاپس، تربیتی سیشنز اور لیڈرشپ سرکلز میں حصہ لیا۔ 100 لڑکیوں کو مکمل تربیت کے بعد ’سائبر شیروز‘ کے خطاب سے نوازا گیا، جنہیں اسناد اور اعزازی پنز دی گئیں۔ یہ ’شیروز‘ اپنے اسکولوں اور کمیونٹیز میں ڈیجیٹل ہیلپ ڈیسک اور آگاہی مہمات چلائیں گی۔
مزید برآں، معروف سائبر سیکیورٹی ماہر کرنل سنجیو ریلیا کی قیادت میں سائبر ہائجین اور ڈیجیٹل ٹولز پر ایک مہارت سازی ورکشاپ بھی منعقد کی گئی۔
سائبر پیس فاؤنڈیشن کے صدر اور بانی میجر ونیت کمار نے کہا:
“’سائبر شیروز‘ ایک ایسی نسل کو جنم دے گا جو نہ صرف خود کو محفوظ رکھے گی بلکہ دوسروں کے تحفظ کے لیے بھی سرگرم ہوگی۔ ہمیں فخر ہے کہ ہم اس کمیونٹی پر مبنی ڈیجیٹل تحفظ کے ماڈل کا حصہ ہیں، اور انموبی کے ساتھ اس قابل فخر شراکت داری کو آگے بڑھائیں گے۔”
دہلی پولیس کے اسسٹنٹ کمشنر آف پولیس (ACP) منوج کمار نے کہا :
ڈیجیٹل جرائم تیزی سے بدل رہے ہیں، اور نوجوانوں، خاص طور پر لڑکیوں کو ابتدائی جواب دہندگان کے طور پر تیار کرنا وقت کی اہم ضرورت ہے۔ ’سائبر شیروز‘ دہلی اور ملک بھر میں ایک محفوظ، شمولیتی سائبر ماحول بنانے کے ہمارے مقصد سے ہم آہنگ ہے۔”
