ڈفی آئی سی سی ٹی20 گیندبازی رینکنگ میں سر فہرست

دبئی، 2 اپریل (یواین آئی) ویلنگٹن میں پاکستان کے خلاف آخری میچ میں اپنی ٹیم کی شاندار فتح میں اہم کردار ادا کرنے والے نیوزی لینڈ کے تیز گیند باز جیکب ڈفی نے آئی سی سی مردوں کی ٹی20 گیندبازی رینکنگ میں سر فہرست مقام حاصل کر لیا ہے۔ڈفی نے ویسٹ انڈیز کے اسپنر عقیل حسین کو سر فہرست سے ہٹا کر یہ مقام حاصل کیا۔ ڈفی نے پچھلے ہفتے سات پوزیشن کی چھلانگ لگائی تھی اور ایڈم زمپا کے ساتھ مشترکہ طور پر پانچویں مقام پر پہنچے تھے اور اس ہفتے انہوں نے حسین کے علاوہ وانندو ہسرنگا، عادل راشد اور ورن چکرورتی کو پیچھے چھوڑ دیا۔ انہوں نے 18 رنز دے کر دو وکٹیں حاصل کیں، جن میں اوپننگ بلے باز حسن نواز اور تیسرے نمبر کے بلے باز عمر یوسف کی وکٹیں شامل ہیں۔بین سیئرز بھی گیند بازوں کی فہرست میں 21 پوزیشنز اوپر چڑھ کر 46 ویں نمبر پر پہنچ گئے ہیں، جبکہ ٹم سیفرٹ نے 38 گیندوں پر چھ چوکے اور 10 چھکے کی مدد سے ناٹ آوٹ 97 رن کی اننگز کھیل کر بلے بازوں کی فہرست میں اپنے کیریئر کی بہترین آٹھویں رینکنگ حاصل کی ہے۔ ان کے اوپننگ پارٹنر فِن ایلن ایک پوزیشن اوپر چڑھ کر 15 ویں نمبر پر پہنچ گئے ہیں۔پاکستان کے لیفٹ آرم اسپنر سفیان مقیم 25 درجے بہتری کے ساتھ 86 ویں نمبر پر آگئے ہیں۔ اس رینکنگ میں نیوزی لینڈ اور پاکستان کے درمیان نیپئر میں کھیلا جانے والا پہلا ون ڈے بھی شامل ہے جو گھریلوٹیم نے 73 رنز سے جیتا تھا۔ مارک چیپ مین نے 111 گیندوں پر 13 چوکوں اور چھ چھکوں کی مدد سے 132 رنز کی میچ وننگ اننگز کھیلی جس کی وجہ سے وہ 24 درجے کی چھلانگ لگا کر 78 ویں نمبر پر پہنچ گئے۔ دریں اثناء پاکستانی بلے باز سلمان آغا 58 رنز کی اننگز کے بعد چھ درجے کی چھلانگ لگا کر 37 ویں نمبر پر پہنچ گئے ہیں۔ون ڈے بولنگ رینکنگ میں پاکستان کے تیزگیندباز حارث رؤف 38 رنز کے عوض 2 وکٹیں لے کر 9 درجے بہتری کے بعد 16 ویں نمبر پر آ گئے ہیں جبکہ نسیم شاہ ایک درجے کی چھلانگ لگا کر 42 ویں نمبر پر آ گئے ہیں۔نیوزی لینڈ کے تیز گیند باز ولیم اورورک (15 درجے کی بہتری کے ساتھ 56 ویں نمبر پر) اور ڈفی (14 پائیدان کی بہترین کے ساتھ 95 ویں نمبر پر) بھی فہرست میں آگے بڑھ گئے ہیں۔