احمد آباد، 26 مارچ (ہ س)۔ آئی پی ایل 2025 کے اپنے پہلے میچ میں، پنجاب کنگز (پی بی کے ایس) نے منگل کو گجرات ٹائٹنز (جی ٹی) کو 11 رنوں سے شکست دے کر ایک شاندار آغاز کیا۔ اس جیت میں شریس ایر کی 97 رنوں کی ناٹ آوٹ اننگز اور ششانک سنگھ کی طوفانی بلے بازی نے اہم کردار ادا کیا۔پنجاب کنگز کی اننگز کے آخری اوور میں کپتان شریس ایر 97 رنوں پر کھیل رہے تھے لیکن ششانک سنگھ کو ہر گیند پر چوکے اور چھکے لگانے کی کوشش کرنے کی ہدایت دی گئی۔ ششانک نے بھی ایسا ہی کیا اور آخری اوور میں 23 رن جوڑ کر ٹیم کے اسکور کو 243/5 تک پہنچا دیا۔ ششانک نے 16 گیندوں میں ناٹ آوٹ 44 رن بنائے۔میچ کے بعد ششانک نے کہا، ’’میں نے اسکور بورڈ نہیں دیکھا تھا، لیکن جب میں نے پہلی گیند پر چوکا لگایا تو میں نے دیکھا کہ شریس 97 رن پر ہیں۔ میں ان سے پوچھنے والا تھا کہ کیا مجھے سنگل لینا چاہیے، لیکن انہوں نے خود کہا کہ ان کی سنچری کی فکر نہ کریں۔ یہ کہنا بڑی ہمت اور ٹیم اسپرٹ کو ظاہر کرتا ہے۔‘‘ گجرات ٹائٹنز کو جیت کے لیے 244 رن کا ہدف ملا تھا جسے حاصل کرنے کے لیے انہوں نے شاندار آغاز کیا۔ سائی سدرشن (74 رن)، جوس بٹلر اور شیرفین ردرفورڈ کی اننگز نے ٹیم کو 14ویں اوور تک مضبوط پوزیشن میں رکھا۔ گجرات نے 9 اور 14 اوورز کے درمیان 87 رن بنائے اور اسے آخری چھ اووروں میں 75 رن درکار تھے۔ حالانکہ پنجاب کنگز کے امپیکٹ کھلاڑی وجے کمار ویشاک نے شاندار گیند بازی کرکے میچ کا رخ ہی بدل دیا۔ انہوں نے اپنے پہلے دو اوورز میں صرف 10 رن دیے اور 10 ڈاٹ گیندیں پھینکیں، جس سے گجرات کی رفتار ٹوٹ گئی۔ پنجاب نے لگاتار تین اوورز میں کوئی باونڈری نہیں دی جس کی وجہ سے گجرات میچ سے باہر ہو گیا۔ششانک نے شریس ایر کی کپتانی کی بہت تعریف کی۔ انہوں نے کہا، ’’شریس کی کپتانی مجرب فیصلوں پر مبنی ہے۔
یہی وجہ ہے کہ وہ دنیا کے بہترین کپتانوں میں سے ایک ہیں۔ ہمیں معلوم تھا کہ ویشاک کو کب لانا ہے اور انہوں نے شاندار گیندبازی کی۔ انہوں نے مشکل اوورز میں درست یارکر پھینکے اور ہمیں فتح سے ہمکنار کیا۔‘‘اس جیت کے ساتھ ہی پنجاب کنگز نے آئی پی ایل 2025 کی شاندار شروعات کرتے ہوئے اپنے ارادے واضح کر دیے ہیں۔
شریس نے کہا تھا، میری سنچری کی فکر نہ کرو، صرف چوکے اور چھکے مارو: ششانک سنگھ
