بخارسٹ، 5 فروری (یو این آئی) دو بار کی گرینڈ سلیم چیمپئن سیمونا ہالیپ نے ٹینس سے ریٹائرمنٹ لے لی ہے۔رومانیہ کی ٹینس اسٹار ہالیپ نے اٹلی کی لوسیا برونزٹی سے پہلے راؤنڈ کی 6-1، 6-1 سے شکست کے بعد ٹرانسلوانیا اوپن میں کورٹ پر اپنے ریٹائرمنٹ کا اعلان کیا۔میچ کے بعد ہالیپ نے کہا، میں نے یہ فیصلہ اپنے ضمیر سے لیا ہے۔ میں عالمی نمبر ایک کھلاڑی بنی، گرینڈ سلیم جیتا، یہ اچھی بات تھی، میں بس یہی چاہتی تھی۔ زندگی ایسے ہی چلتی رہتی ہے، ٹینس کے بعد بھی زندگی ہے اور مجھے امید ہے کہ ہم ایک دوسرے سے پھر ملیں گے۔میڈیا رپورٹس کے مطابق دو سال طویل ڈوپنگ کیس کے بعد ڈبلیو ٹی اے ٹور میں واپسی کے بعد اس ہفتے منعقد ہونے والا یہ ان کا پانچواں ٹورنامنٹ تھا۔ گزشتہ ماہ انہیں گھٹنے کی انجری کی وجہ سے آسٹریلین اوپن کوالیفائنگ سے دستبردار ہونا پڑا تھا۔ہالیپ نے 2018 میں فرنچ اوپن میں سلوین سٹیفنز کو شکست دے کر اپنا پہلا بڑا ٹائٹل جیتا تھا۔ اس کے بعد اس نے 2019 میں ومبلڈن میں جیت حاصل کی۔
