جھارکھنڈ میں دودھ جمع کرنے کے مراکز بڑھیں گے: شلپی نیہا ترکی
جدید بھارت نیوز سروس
رانچی، 20 دسمبر:۔ زراعت، مویشی پروری اور کو آپریٹیو کی وزیر شلپی نیہا ترکی نے رانچی کے ہوٹوار میں واقع میدھا ڈیری پلانٹ کا اچانک معائنہ کیا۔ اس دوران انہوں نے مویشیوں کے چارے کی پیداوار کا بھی جائزہ لیا۔ وزیر نے میدھا کی مصنوعات کو نہ صرف ریاست کے اندر بلکہ دیگر ریاستوں میں بھی لے جانے کی بات کی۔ وزیر نے کہا کہ دلال دیہی علاقوں میں سرگرم ہیں۔ ایسے میں مویشی پالنے والے کسانوں کو دودھ کی مناسب قیمت نہیں مل پا رہی ہے۔ انہوں نے ریاست میں دودھ جمع کرنے کے مراکز کو بڑھانے کی بات کی۔ تاکہ مڈل مینوں کی سنڈیکیٹ ختم کر کے مویشی پالوں سے مناسب قیمت پر دودھ وصول کیا جا سکے۔ شلپی نیہا ترکی نے کہا کہ فی الحال تین لاکھ لیٹر دودھ اکٹھا کیا جا رہا ہے، لیکن مارکیٹ کی مانگ 10 لاکھ لیٹر یومیہ ہے۔ دوسری کمپنیاں مارکیٹ کی طلب پوری کر رہی ہیں۔وزیر موصوف نے کہا کہ خواتین مویشی پالنے کے ذریعے معاشی طور پر بااختیار بن سکتی ہیں۔ وزیر نے کہا کہ مینڈھر کی ایک خاتون 2016 سے مویشی پالنا سے وابستہ ہے۔ آج وہ دودھ بیچ کر ماہانہ 2 لاکھ روپے تک کما رہی ہے۔
