70views
تاریخ میں پہلی بار انٹر کانٹی نینٹل بیلسٹک میزائل داغا گیا
نئی دہلی، 21 نومبر:۔ (ایجنسی) روس نے پہلی بار یوکرین پر بین البراعظمی بیلسٹک میزائل داغا ہے۔ موجودہ جنگ میں پہلی بار آئی سی بی ایم کا استعمال کیا گیا ہے۔ روس نے جمعرات کی صبح پانچ سے سات بجے کے درمیان یوکرین کے شہر دنیپرو پر بیلسٹک میزائل سے حملہ کیا۔ روس نے صنعتی اور انفراسٹرکچر کو نشانہ بنایا۔ یوکرین کی فضائیہ نے روسی حملے کی تصدیق کر دی ہے۔ دنیپرو شہر کے بارے میں بتایا جا رہا ہے کہ یہ تاریخ کا پہلا شہر بن گیا ہے جس پر بین البراعظمی بیلسٹک میزائل سے حملہ کیا گیا ہے۔ یوکرین نے کہا ہے کہ روس نے جنگ میں پہلی بار انٹرکانٹینینٹل بیلسٹک میزائل (ICBM) کا استعمال گزشتہ رات یوکرین کے شہر دنیپرو کو نشانہ بنا کر کیا۔ یوکرین کی فضائیہ نے ٹیلی گرام پر ایک بیان میں کہا ہے کہ اسے روس کے استراخان علاقے سے فائر کیا گیا تھا۔ یہ پیش رفت ایک ایسے وقت میں ہوئی ہے جب جنگ نے مزید بین الاقوامی جہت اختیار کر لی ہے جب کہ شمالی کوریا کے فوجی میدان جنگ میں روس کی مدد کے لیے پہنچ رہے ہیں۔
