مسلم ویلفیئر سوسائٹی کی جانب سے تیسواں سالانہ بینائی جانچ و آپریشن کیمپ کا انعقاد
آسنسول،20نومبر (راست) آسنسول میونسپل کارپوریشن کے وارڈ نمبر 82 میں واقع مسلم فنڈ مسلم ویلفیئر سوسائٹی کی جانب سے تیسواں سالانہ بینائی جانچ و آپریشن کیمپ کا انعقاد کیا گیاہے۔ اس سلسلے میں مسلم فنڈ کے سیکرٹری الحاج طلحہ خان اور مینیجر مولانا نور عالم قاسمی نے بتایا کہ جمعیت العلماء کے فلاحی شعبہ کی جانب سے 1991 سے یہ سلسلہ شروع کیا گیا ہے جو اس بار 30 واں سالانہ کیمپ میں پہنچا ہے۔ مولانا نے فرمایا کہ سالہائے گزشتہ کی طرح اس بار بھی موسم سرما کے موقع پر ناداروں کا بلا تفریق مذہب و ملت کے مفت بینائی جانچ و آپریشن کیمپ کیا جاتا ہے ۔جس میں اس بار 350 سے زائد مرد و خواتین نے نام اندراج کرایا اور ان میں سے 180 مریضوں کو آپریشن کے لیے فٹ پایا گیا ۔ سلسلہ وار ان کا آپریشن آسنسول کے معروف آئی ہاسپٹل پنر درشٹی میں کیا جائے گا۔ مفت لینز بھی لگایا جائے گا اور تمام مریضوں کے آمد و رفت کی سہولت کے علاوہ ایک ایک کمبل بھی انہیں دیا جائے گا۔ مولانا نور عالم قاسمی نے دعویٰ کیا کہ اب تک تمام آپریشن نہایت ہی کامیاب رہا ہے اور ایک بھی مریض کی بینائی خراب نہیں ہوئی ہے انہوں نے اس کار خیر کے آغاز کے لیے حاجی عبداللہ مرحوم کو خراج عقیدت پیش کیا اور کہا کہ ان کے ذریعے قائم کردہ اس فلاحی کام کو جمعیت کے اراکین ہنوز جاری رکھے ہوئے ہیں۔
