کانگریس کے اعلیٰ عہدیداروں نےپورنیما نیرج سنگھ کی جیت کو یقینی بنانے کیلئے جھریا میں میٹنگ کی
تمام عہدیداروں اور کارکنوں کو اپوزیشن پارٹی کے خلاف لڑنے کے اوصاف سکھائے
جدید بھارت نیوز سروس
دھنباد، 13نومبر: انڈیا گرینڈ الائنس سے کانگریس کی امیدوار محترمہ پورنیما نیرج سنگھ کی جیت کو یقینی بنانے کے لیے جھارکھنڈ پردیش کانگریس کے انچارج غلام احمد میر اور جھارکھنڈ پردیش کانگریس کمیٹی کے صدر کیشو مہتو کملیش اور سابق صدر راجیش ٹھاکرنے جھریا کے جیل گوڑہ میں جھریا انچارج بھگوان داس اور سٹی کانگریس کمیٹی کے صدر رتنیش یادو کی قیادت میں تمام اسمبلی کے بوتھ لیول اور وارڈ سطح کے کارکنوں کے ساتھ میٹنگ کی ۔ میٹنگ سے خطاب کرتے ہوئے انہوں نے تمام عہدیداروں اور کارکنوں کو اپنی اہم اپوزیشن پارٹی کے خلاف لڑنے کے اوصاف سکھائے۔ ریاستی انچارج نے کہا کہ انتخابات میں جیت صرف امیدوار کی نہیں ہوتی بلکہ یہ ہر کارکن اور عوام کی جیت ہوتی ہے۔ پورنیما نے خود کو عوام کے لیے وقف کر دیا ہے۔ اس لیے یہ جلسہ کارکنوں کی حوصلہ افزائی کے لیے ہے۔ ریاستی انچارج نے کہا کہ یہ کانگریس کا طریقہ ہے – ایک روایت ہے، ہم اس کے مطابق کام کرتے ہیں – پارٹی میں جگہ حاصل کرنے کے لیے کوئی شارٹ کٹ نہیں ہے، اس کے لیے سب کو اپنی ذمہ داریاں پوری لگن کے ساتھ نبھانی ہوں گی۔ کارکنوں کو بوتھ میں کس طرح کام کرنا ہے اور کسی بھی تکلیف کی صورت میں کہاں شکایت کرنی ہے اس بارے میں معلومات شیئر کیں۔ ایم ایل اے نے کہا کہ اپنے 05 سال کے دور میں ہم نے زیادہ سے زیادہ وقت عوامی فلاح و بہبود کے کاموں میں صرف کیا ہے۔ آج کی یہ تیاری اگلے پانچ سالوں کے لیے جھریا کا مستقبل طے کرے گی۔ میٹنگ میں خاص طور پر ریاست کے شریک انچارج پرساد شریویلا، ضلع ایگزیکٹیو صدر رشید رضا انصاری، اپیندر شرما، ریاست کے خصوصی مدعو ممبران مختار خان ، تبریز خان، روی سنگھ، پنٹو توری، راجیو پانڈے، راجہ انصاری،بی کے سنگھ، وریندر بہادر سنگھ سمیت کانگریس کے سرکردہ لوگ موجود تھے۔
