جھارکھنڈ کے لوگ اب انڈیااتحاد کی حکومت کا تختہ اکھاڑ پھینکنے کیلئے بے چین ہیں: وزیر اعظم مودی
نئی دہلی، 4 نومبر (ہ س)۔ بھارتیہ جنتا پارٹی (بی جے پی) کے سینئررہنما اور وزیر اعظم نریندر مودی نےسوموار کو کہا کہ جھارکھنڈ کے لوگ اب انڈیا اتحاد کی حکومت کو بے دخل کرنے اور تختہ اکھاڑ پھینکنے کیلئے بے چین ہیں۔ انہوں نے کہا کہ آج جھارکھنڈ میں ہر طرف ایک ہی گونج ہے، 'جھارکھنڈ میں روٹی-بیٹی-مٹی، بی جے پی-این ڈی اے کی حکومت'، جھارکھنڈ کے گڑھوا میں ایک جلسہ عام سے خطاب کرتے ہوئے وزیر اعظم نے کہا کہ چند مہینے پہلے عوام نے مسلسل تیسری بار بی جے پی-این ڈی اے کی حکومت بنائی۔ اب جھارکھنڈ میں اسمبلی انتخابات ہیں، ہم سب کو مل کر یہاں بی جے پی-این ڈی اے کی قیادت میں ڈبل انجن والی حکومت بنانا ہوگی۔ انہوں نے کہا کہ میں یہاں عوام سے آشیرواد لینے آیا ہوں۔ خاندان پرستی کے مسئلہ پر جے ایم ایم، کانگریس اور آر جے ڈی پر حملہ کرتے ہوئے وزیر اعظم نے کہا کہ خاندان پرستی جھارکھنڈ کی بڑی دشمن ہے۔ انہوں نے کہا کہ یہ تینوں جماعتیں انتہائی خاندانی ہیں۔ وہ چاہتے ہیں کہ اقتدار کی چابیاں صرف ان کے خاندان کے پاس رہیں۔ انہوں نے کہا کہ جھارکھنڈ کے نوجوانوں کی صلاحیتوں کو بڑھانا اور انہیں نئے مواقع فراہم کرنا حکومت کی ذمہ داری ہے، لیکن جے ایم ایم، کانگریس اور آر جے ڈی نے جھارکھنڈ کے نوجوانوں کو دھوکہ دیا ہے۔ انہوں نے (جے ایم ایم-کانگریس) جھارکھنڈ کے نوجوانوں کو بے روزگاری الاؤنس دینے کا وعدہ کیا تھا، لیکن وعدہ پورا نہیں کیا۔ بھرتیوں میں دھاندلی اور پیپر لیک یہاں کی صنعت بن چکی ہے۔ کانسٹیبل بھرتی کے دوران جے ایم ایم حکومت کی لاپرواہی کی وجہ سے کئی نوجوانوں کی المناک موت ہوگئی۔ اب جھارکھنڈ بی جے پی نے اس صورتحال کو بدلنے کا فیصلہ کیا ہے۔ ریاست میں بی جے پی کی حکومت بننے کے بعد تقریباً 3 لاکھ سرکاری عہدے شفاف طریقے سے بھرے جائیں گے۔انہوں نے کہا کہ جہاں بھی کانگریس اور اس کے اتحادی جھوٹ بول کر اقتدار میں آئے ہیں۔ انہوں نے اس ریاست کو برباد کیا ہے۔ کانگریس صدر (ملکارجن کھڑگے) نے بھی اعتراف کیا ہے کہ کانگریس جھوٹی گارنٹی دیتی ہے۔ دانستہ یا نادانستہ ان کے منہ سے سچ نکلا ہے۔ انہوں نے کہا کہ کانگریس کے یہ بے معنی اعلانات ریاستوں کو دیوالیہ کر دیں گے، چھٹھ کے جوش کا ذکر کرتے ہوئے، وزیر اعظم نے ان لوگوں کے لیے نیک خواہشات کا اظہار کیا جو چھٹھی میا کی پوجا کرتے ہیں۔ انہوں نے کہا کہ جھارکھنڈ میں یہ انتخابات ایسے وقت میں ہو رہے ہیں جب پورا ملک ‘ترقی یافتہ ہندوستان’ کے عزم کے ساتھ آگے بڑھ رہا ہے یعنی آنے والے 25 سال ملک اور جھارکھنڈ کے لیے بہت اہم ہیں۔
ملک کی آزادی کے 100 سال مکمل ہوں گے اور اس وقت تک جھارکھنڈ بھی 50 سال کا ہو جائے گا، انہوں نے کہا کہ بی جے پی جھارکھنڈ کی سہولت، سلامتی، استحکام اور خوشحالی کی گارنٹی کے ساتھ انتخابی میدان میں اتری ہے۔ وزیر اعظم نے جھارکھنڈ بی جے پی کو ایک بہترین انتخابی منشور جاری کرنے پر مبارکباد دی۔ انہوں نے کہا کہ یہسنکلپ روٹی بیٹی ماٹی کے احترام، سلامتی اور خوشحالی کے لیے وقف ہے۔ جھارکھنڈ بی جے پی کے منشور میں ماؤں، بہنوں اور بیٹیوں کی فلاح و بہبود کے لیے کئی قراردادیں لی گئی ہیں۔ ’گوگو دیدی اسکیم‘ کے تحت ماؤں اور بہنوں کو ہر ماہ 2100 روپے دیے جائیں گے۔ اجولا اسکیم کے تحت غریب خاندانوں کی ماؤں اور بہنوں کو پہلے گیس کنکشن دیا جاتا تھا، اب جھارکھنڈ میں بننے والی بی جے پی کی حکومت 500 روپے میں گیس سلنڈر فراہم کرے گی، اس کے ساتھ وہ اگلے سال دیوالی اور رکشا بندھن پر دو مفت سلنڈر بھی دے گی۔ وزیر اعظم نے کہا کہ ہم جھارکھنڈ کی ترقی کے لیے پوری کوشش کر رہے ہیں۔
جب آپ لوگ یہاں ڈبل انجن کی حکومت بنائیں گے تو ریاست کی ترقی بھی دوگنی رفتار سے ہونے لگے گی۔ انہوں نے کہا کہ جھارکھنڈ کے نوجوانوں میں ٹیلنٹ کی کوئی کمی نہیں ہے۔ ہمارے جھارکھنڈ کے یہ بیٹے اور بیٹیاں کھیلوں کے میدان میں جھارکھنڈ کا جذبہ دکھاتے ہیں۔
