امیدواروں کی پہلی فہرست 19 اکتوبر کے بعد جاری ہوگی: غلام احمد میر
جدید بھارت نیوز سروس
رانچی، 17 اکتوبر:۔ کانگریس جھارکھنڈ اسمبلی انتخابات جھارکھنڈ مکتی مورچہ (جے ایم ایم) کے ساتھ اتحاد میں لڑے گی اور سیٹوں کی تقسیم پر جلد ہی حتمی فیصلہ متوقع ہے۔ جمعرات کو اس معاملے کی جانکاری دیتے ہوئے پارٹی کے ایک سینئر لیڈر نے کہا کہ سیٹوں کی تقسیم جلد ہو جائے گی اور امیدواروں کی فہرست بھی جاری کر دی جائے گی۔ کانگریس جنرل سکریٹری اور جھارکھنڈ کے انچارج غلام احمد میر نے کہا کہ کانگریس امیدواروں کی پہلی فہرست 19 اکتوبر کے بعد جاری کی جائے گی۔ جے ایم ایم کے 18 ممکنہ امیدواروں کی فہرست سامنے آئی ہے جس میں سی ایم ہیمنت سورین کے ساتھ ساتھ ان کی اہلیہ کلپنا سورین کے نام بھی شامل ہیں۔
اس بارے میں جانکاری دیتے ہوئے میر نے کہا کہ 2019 کی طرح ہم ریاست میں اپنے اتحادیوں کے ساتھ اسمبلی انتخابات لڑیں گے۔ نشستوں کی تقسیم کو تقریباً حتمی شکل دے دی گئی ہے اور اس پر جلد ہی حتمی فیصلہ متوقع ہے۔ ہم 19 اکتوبر کے بعد امیدواروں کی پہلی فہرست جاری کریں گے، خاص طور پر ہمارے رہنما راہول گاندھی کے ریاست کے دورے کے بعد۔ ایسے میں مانا جا رہا ہے کہ ٹکٹ کی تقسیم میں راہل گاندھی کا بڑا رول ہو سکتا ہے۔
میر نے کہا کہ پارٹی کو ریاست میں جے ایم ایم کی قیادت والی مخلوط حکومت کی طرف سے کئے گئے ترقیاتی کاموں کی طاقت پر انتخابات جیتنے کا یقین ہے۔ میر نے کہا کہ راہل گاندھی 19 اکتوبر کو ایس سی؍ایس ٹی اور او بی سی سمیت مختلف سماجی اور دیگر تنظیموں کے ساتھ میٹنگ کریں گے۔
جھارکھنڈ کے وزیر اعلیٰ ہیمنت سورین پہلے ہی اعلان کر چکے ہیں کہ جے ایم ایم کی قیادت والا اتحاد تمام 81 سیٹوں پر الیکشن لڑے گا۔ جھارکھنڈ اسمبلی کی موجودہ مدت 5 جنوری 2025 کو ختم ہوگی۔ اس کے لیے انتخابات کی تاریخوں کا اعلان کر دیا گیا ہے اور کانگریس، بی جے پی کے ساتھ ساتھ جے ایم ایم اور اے جے ایس یو نے اپنی اپنی تیاریاں شروع کر دی ہیں۔
