بھگوان رام کے نظریات کو اپنانے کی نصیحت کی
جدید بھارت نیوز سروس
رانچی، 13 اکتوبر:۔ دسہرہ کا تہوار سنیچر کے روز راجدھانی میں راون کا پتلا جلا کر بڑے دھوم دھام سے منایا گیا۔ شہر کے مختلف مقامات پر راون کے پتلے جلائے گئے۔ برائی پر اچھائی کی جیت کا جشن منایا گیا۔ مورہابادی، ارگوڑا، ایچ ای سی، ٹاٹی سلوے اور دیگر مقامات پر رقص، گانے، رام لیلا اور ثقافتی پروگرام ہوئے۔ پائرو فائر ورکس کے خوبصورت نظارے کے ساتھ آسمانی آتش بازی کا ایک الگ ہی جذبہ تھا۔ سی ایم ہیمنت سورین نے بھی بڑی تعداد میں عقیدت مندوں کے ساتھ مورہابادی اور ارگوڑا میدان میں بطور مہمان خصوصی شرکت کی۔
جھارکھنڈ کے وزیر اعلیٰ ہیمنت سورین نے ددسہرا کے موقع پر رانچی کے مورہابادی میدان میں منعقدہ دسہرہ تقریب میں بطور مہمان خصوصی شرکت کرکے راون کا پتلا جلایا۔ اس موقع پر انہوں نے ریاست کے لوگوں کو دل کی گہرائیوں سے دسہرہ کی مبارکباد دی اور ان سے اپیل کی کہ وہ بھگوان رام کے نظریات کو اپنی زندگیوں میں سمیٹیں۔ پنجابی ہندو برادری دسہرہ کمیٹی کے زیر اہتمام اس پروگرام میں ہزاروں لوگوں نے شرکت کی۔وزیر اعلیٰ نے کہا کہ دسہرہ کا تہوار جھوٹ پر سچ کی جیت کی علامت ہے۔ ہم بھگوان رام کی زندگی سے بہت سے سبق سیکھتے ہیں۔ ہمیں ان کے نظریات کو اپنی زندگیوں میں اپنانا چاہیے۔ انہوں نے کہا کہ راون دہن کا یہ پروگرام ہمیں برائی پر اچھائی کی جیت کا پیغام دیتا ہے۔اس موقع پر مرکزی وزیر مملکت برائے دفاع سنجے سیٹھ، رانچی کے ایم ایل اے سی پی سنگھ، سابق ڈپٹی میئر سنجیو وجے ورگیہ سمیت کئی معززین موجود تھے۔ پروگرام میں شاندار ثقافتی پروگرام بھی پیش کیے گئے۔ فنکاروں نے بھگوان رام، لکشمن اور سیتا ماتا کا روپ دھار کر لوگوں کو محظوظ کیا۔ آتش بازی کا خوبصورت نظارہ بھی دیکھنے کو ملا۔
