اب ایڈووکیٹ پروٹیکشن ایکٹ پر پہل کی جائے گی: ایڈوکیٹ جنرل
رانچی:۔ ریاست کے ایڈوکیٹ جنرل راجیو رنجن نے وکلاء کے لیے ریاستی حکومت کی طرف سے شروع کی گئی اسکیموں کی تعریف کی۔ انہوں نے بتایا کہ ریاست میں 164 وکلاء پنشن اسکیم کا فائدہ اٹھا رہے ہیں۔ اس سے قبل نئے وکلاء کو ماہانہ ایک ہزار روپے کی مراعاتی رقم دی جاتی تھی جسے بڑھا کر اب پانچ ہزار روپے کر دیا گیا ہے۔ 7 جنوری کو وزیر اعلیٰ ہیمنت سورین نے ریاست کے وکلاء سے براہ راست رابطہ کیا اور ان کی حالت زار کو سنا۔ ساتھ ہی انہوں نے وکلاء سے وعدہ کیا تھا کہ وہ وکلاء کو ہیلتھ انشورنس اور لائف انشورنس سے جوڑیں گے۔ وزیراعلیٰ نے اپنا وعدہ پورا کیا۔ جھارکھنڈ ملک کی پہلی ریاست ہے، جہاں حکومت وکلاء کو اپنی اسکیموں سے جوڑ کر معاشی طور پر مضبوط کر رہی ہے۔ ریاست کے تقریباً 15 ہزار وکلاء ٹرسٹی کمیٹی کے رکن ہیں۔ اس وقت حکومت نے ہیلتھ انشورنس کے لیے 13 کروڑ روپے کا انتظام کیا ہے۔ ایڈوکیٹ جنرل نے ڈسٹرکٹ بار ایسوسی ایشن اور وکلاء کے مفاد میں کام کرنے والی دیگر ایسوسی ایشنوں پر زور دیا ہے کہ وہ ریاست کے تمام وکلاء کو سرکاری اسکیموں سے جوڑیں۔ اس کے ساتھ انہوں نے کہا کہ طویل عرصے سے زیر التوا ایڈوکیٹ پروٹیکشن ایکٹ کی سمت میں بھی پہل کی جائے گی۔ ایڈووکیٹ جنرل ہائی کورٹ کے آڈیٹوریم میں پریس کانفرنس سے خطاب کر رہے تھے۔
