مصری سیاح محمد فریضہ حج کی ادائیگی کے لیے سائیکل پر 1700 کلومیٹر کا سفر 26 دن میں طے کر کے مکہ پہنچا تاہم اسے راستے میں ایک حیرت انگیز چیز کا سامنا ہوا۔
عرب میڈیا اخبار 24 کے مطابق مصر کا شہری محمد جس نے گزشتہ ماہ قاہرہ سے سعودی عرب کے لیے سائیکل پر اپنے سفر کا آغاز کیا تھا اور 1700 کلومیٹر کا سفر 26 دن میں طے کرکے مکہ مکرمہ پہنچا اس کو راستے میں جن تجربات سے گزرنا پڑا وہ انتہائی سنسنی خیز رہے۔
نوجوان سیاح نے بتایا کہ اس نے مصر سے سعودی عرب تک کا سفر تنہا سائیکل پر کیا تاہم اس دوران کچھ خطرناک اور غیر معمولی واقعات بھی پیش آئے۔محمد نے بتایا کہ سفر کے آغاز میں ایک وقت ایسا آیا کہ رات کے وقت اسے محسوس ہوا کہ سائیکل پر اس کے علاوہ کوئی اور بھی بیٹھا ہے، جس کی وجہ سے اس کی رفتار کم ہو گئی تھی۔
مصری سیاح جو پیشے کے لحاظ سے انٹیریئر ڈیکوریٹر ہے اس نے اپنے سفر کا آغاز مصر کی مغربی کمشنری سے کیا جہاں سے وہ قاھرہ پہنچے اور بحری جہاز میں اردن کی بندرگاہ العقبہ پر اترے جہاں سے وہ تبوک آئے اور پھر تیما، خیبر سے گزرتے ہوئے مدینہ منورہ پہنچے اور وہاں چند دن قیام کے بعد مکہ مکرمہ کے لیے عازم سفر ہوئے۔محمد نے راستے میں الجموم میں لوگوں کی غیر معمولی میزبانی کو سراہا اور کہا کہ فریضہ حج کی ادائیگی کے بعد وہ سائیکل پر ہی خیلجی ملک کا سفر کریں گے جو 4100 کلومیٹر طویل ہوگا۔
