این آر سی اور تقسیم کی سیاست پرممتا بنرجی کا مودی حکومت پر سیدھا حملہ
جدید بھارت نیوز سروس
کولکاتہ: بھوانی پور میں انتخابی مہم کے دوران ایک دلچسپ اور ہنگامہ خیز واقعہ سامنے آیا، جہاں ممتا بنرجی ایک ’گھریلو ملاقات‘ کے لیے پہنچیں، مگر وہاں مائیکروفون اور بڑے بینرز دیکھ کر سخت ناراض ہو گئیں۔ یہ میٹنگ وارڈ نمبر 72 کے لیڈیز پارک (اتم ادیان) میں رکھی گئی تھی، جہاں وہ عام لوگوں سے سیدھی بات چیت کرنا چاہتی تھیں۔ممتا بنرجی نے موقع پر موجود کونسلروں کو ڈانٹتے ہوئے واضح کہا کہ یہ کوئی سیاسی جلسہ نہیں بلکہ عام لوگوں سے نجی گفتگو ہے، اس لیے یہاں مائیکروفون یا اسٹیج کی ضرورت نہیں تھی۔ انہوں نے یہاں تک ہدایت دی کہ اگر میٹنگ کے اندر کوئی غیر ضروری پولیس اہلکار یا پارٹی کارکن موجود ہیں تو وہ فوراً باہر چلے جائیں، کیونکہ وہ عوام سے براہِ راست اور سادہ انداز میں بات کرنا چاہتی ہیں۔دلچسپ بات یہ رہی کہ اس پوری میٹنگ میں ممتا بنرجی نے بھوانی پور کے بی جے پی امیدوارشوبھندوو ادھیکاری کا نام تک نہیں لیا۔ ان کی تقریر کا اصل نشانہ براہِ راست وزیر اعظم نریندر مودی رہے۔ انہوں نے سوال اٹھایا کہ گزشتہ 12 سالوں میں مودی حکومت نے کتنے وعدے پورے کیے؟ ساتھ ہی الزام لگایا کہ بی جے پی کے جلسوں میں لوگوں کو پیسے دے کر لایا جاتا ہے، جبکہ ترنمول کی میٹنگوں میں لوگ اپنی مرضی سے آتے ہیں۔ممتا نے مزید کہا کہ بی جے پی انہیں اس لیے نشانہ بنا رہی ہے کیونکہ وہ ان سے خوفزدہ ہے اور جانتی ہے کہ وہ دہلی کی سیاست کو ہلا سکتی ہیں۔ انہوں نے بی جے پی پر مذہب اور ذات کی بنیاد پر سیاست کرنے اور ملک کو تقسیم کرنے کا الزام بھی لگایا۔اس کے ساتھ ہی انہوں نے نیشنل رجسٹر آف سٹیزنز کے معاملے پر بھی تشویش ظاہر کی اور دعویٰ کیا کہ لاکھوں لوگوں کو فہرست سے باہر کر دیا گیا ہے، خاص طور پر اقلیتوں کو نشانہ بنایا جا رہا ہے۔ انہوں نے مرکزی ایجنسیوں جیسے انفورسمنٹ ڈائریکٹوریٹ کے مبینہ غلط استعمال کا بھی ذکر کیا۔تقریر کے بعد ممتا بنرجی نے مقامی لوگوں کی شکایات اور تجاویز کو غور سے سنا۔ کئی لوگوں نے ان کی قیادت کی تعریف کی اور یہاں تک کہا کہ وہ مستقبل میں انہیں ملک کے وزیر اعظم کے طور پر دیکھنا چاہتے ہیں۔میٹنگ میں اسکن کے نمائندے رادھرمن داس بھی موجود تھے۔ انہوں نے دیگھا میں جگن ناتھ دھام کی سالگرہ اور اکشے ترتیا پر ہونے والی بھیڑ کا ذکر کیا، جس پر ممتا نے کہا کہ وہ اگلی رتھ یاترا کے دوران خود دیگھا جائیں گی۔یہ واقعہ نہ صرف انتخابی ماحول کی گرمی کو ظاہر کرتا ہے بلکہ یہ بھی دکھاتا ہے کہ بنگال کی سیاست میں ہر چھوٹی بات بھی بڑی خبر بن جاتی ہے۔
