جدید بھارت نیوز سروس
رام گڑھ ،30؍اپریل: جمعرات کو بھارت کی مردم شماری 2027 کے پہلے مرحلے، یعنی مکانات کی فہرست سازی (ہاؤس لسٹنگ) اور گھروں کی گنتی سے متعلق ایک پریس کانفرنس ڈپٹی کمشنر ریتوراج کی صدارت میں منعقد ہوئی۔ اس موقع پر ایڈیشنل کلکٹر کماری گیتا انجلی اور ضلع اسپورٹس آفیسر سنجیت کمار بنیادی طور پر موجود تھے۔این آئی سی رام گڑھ کے آڈیٹوریم میں منعقدہ پریس کانفرنس میں ڈپٹی کمشنر نے بتایا کہ مردم شماری 2027 کے تمام طریقہ کار شروع کر دیے گئے ہیں۔ اسی سلسلے میں سب سے پہلے ریاستی سطح کے ماسٹر ٹرینرز نے ضلعی سطح کے ماسٹر ٹرینرز کو تربیت دی، جس کے بعد اب ضلعی سطح کے ماسٹر ٹرینرز کے ذریعے بلاک سطح کے ماسٹر ٹرینرز کو تربیت دینے کا کام جاری ہے۔مردم شماری 2027 کے تحت ضلع رام گڑھ میں 8 چارج آفیسرز بنائے گئے ہیں جو مردم شماری کے عمل کی نگرانی کریں گے۔ ان کی مدد کے لیے 1870 شمار کنندگان (اینومریٹرز) اور 312 سپروائزرز تعینات کیے گئے ہیں۔ اس بار مردم شماری کا پورا عمل ڈیجیٹل ذریعے سے مکمل کیا جائے گا۔ اس کے تحت یکم مئی سے 15 مئی تک ‘سیلف اینومریشن‘(خود شماری) کا کام کیا جائے گا، جس کے ذریعے ہر شخص ایپ کی مدد سے مردم شماری سے متعلق تمام معلومات خود بھر سکتا ہے۔اس کے بعد پہلا مرحلہ ’ہاؤس لسٹنگ‘کا ہوگا جس میں مکانات کی فہرست سازی کا عمل شروع ہوگا، جو 16 مئی 2026 سے 14 جون 2026 تک چلے گا۔ اس کے بعد دوسرے مرحلے کا کام ہوگا جس میں آبادی کی گنتی کی جائے گی، یہ کام 9 فروری 2027 سے 28 فروری 2027 تک جاری رہے گا۔ ساتھ ہی ڈپٹی کمشنر نے کہا کہ مردم شماری سے متعلق تمام اہم معلومات اور سہولیات census.gov.in پورٹل پر دستیاب ہیں۔ انہوں نے عام شہریوں سے اپیل کی کہ وہ پورٹل پر جا کر معلومات حاصل کریں اور مردم شماری 2027 میں اپنی شرکت کو یقینی بنائیں۔
مردم شماری 2027 کی تیاریاں تیز، ڈپٹی کمشنر ریتوراج نے پہلے مرحلے کا خاکہ پیش کر دیا
