پلاموں: پوکھراہا میں فلائی اوور کی مانگ، ایم ایل اے ڈاکٹر ششی بھوشن مہتاکا احتجاج شروع

جدید بھارت نیوز سروس
پلاموں، 30 جون :۔ پانکی اسمبلی حلقہ کے رکن اسمبلی ڈاکٹر ششی بھوشن مہتانے پانکی-ڈالٹن گنج روڈ پر واقع پوکھراہا کے مقام پر فلائی اوور کی تعمیر کا مطالبہ کرتے ہوئے تحریک شروع کر دی ہے۔ منگل کے روز ایم ایل اے کی قیادت میں بڑی تعداد میں مقامی باشندوں نے اس مقام پر دھرنا دیا۔
حادثات کا مرکز بنا پوکھراہا
پوکھراہا علاقہ گزشتہ کچھ عرصے سے سڑک حادثات کا مرکز بن چکا ہے۔ گزشتہ 15 دنوں کے دوران یہاں ہوئے حادثات میں تین افراد کی موت ہو چکی ہے، جس کے بعد اس مقام کو ‘بلیک اسپاٹ‘ قرار دیا گیا ہے۔ نیشنل ہائی وے فور لین اور ڈالٹن گنج-پانکی روڈ کے سنگم پر فلائی اوور یا انڈر پاس کی سہولت نہ ہونے کے باعث یہاں سے گزرنے والے ہزاروں افراد اپنی جان جوکھم میں ڈالنے پر مجبور ہیں۔
مطالبات اور آئندہ کا لائحہ عمل
ایم ایل اے ڈاکٹر ششی بھوشن مہتانے کہا کہ انہوں نے یہ مسئلہ کئی بار اسمبلی میں اٹھایا، لیکن حکومت کی جانب سے کوئی توجہ نہیں دی گئی۔ انہوں نے مطالبہ کیا کہ جب تک فلائی اوور تعمیر نہیں ہوتا، تب تک اس شاہراہ پر ٹول کی وصولی فوری طور پر بند کی جائے۔ انہوں نے بتایا کہ وہ اس معاملے کو دوبارہ اسمبلی میں اٹھائیں گے اور مرکزی وزیر برائے روڈ، ٹرانسپورٹ اینڈ ہائی ویز نتن گڈکری کو بھی خط لکھ کر علاقے کی سنگین صورتحال سے آگاہ کریں گے۔