جھارکھنڈ میں ایس آئی آر مہم کا باضابطہ آغاز

اعلیٰ انتخابی حکام نے مختلف اضلاع کا دورہ کیا، گھر گھر تصدیقی مہم کو شفاف بنانے پر زور

جدید بھارت نیوز سروس
رانچی، 30 جون:۔ جھارکھنڈ میں ووٹر لسٹ کی خصوصی گہری نظرثانی (ایس آئی آر) مہم کا منگل سے باضابطہ آغاز ہو گیا۔ مہم کے پہلے دن ریاست کے تمام پولنگ مراکز پر بی ایل او اور بی ایل اے-2 کی میٹنگیں منعقد ہوئیں، جن میں 29 جولائی تک گھر گھر جا کر ووٹروں کی تصدیق کی مہم کے طریقۂ کار اور لائحہ عمل پر تفصیلی تبادلۂ خیال کیا گیا۔
اعلیٰ حکام نے مختلف اضلاع کا کیا معائنہ
مہم کے پہلے روز چیف الیکٹورل آفیسر کے روی کمار نے کھونٹی کے تورپا علاقے میں پولنگ بوتھ نمبر 84، 87 اور 89 کا معائنہ کرتے ہوئے ووٹر لسٹ کی نظرثانی کے کام کا جائزہ لیا۔ اسی طرح رانچی اور بوکارو سمیت دیگر اضلاع میں بھی انتخابی حکام نے پولنگ مراکز کا دورہ کیا اور بی ایل اوز کے ساتھ میٹنگ کر کے مہم کی پیش رفت کا جائزہ لیا۔ ایڈیشنل چیف الیکٹورل آفیسر سبودھ کمار نے سرائے کیلا میں پولنگ بوتھ نمبر 96 پر منعقدہ اجلاس میں شرکت کرتے ہوئے آئندہ کے لائحہ عمل پر تبادلۂ خیال کیا۔
شفاف اور غلطیوں سے پاک فہرست پر توجہ
اسٹیٹ ٹریننگ نوڈل آفیسر دیوداس دتہ نے رانچی کے مختلف پولنگ مراکز کا معائنہ کرتے ہوئے ہدایت دی کہ گھر گھر جا کر ووٹروں کی تصدیق کا عمل مکمل شفافیت اور دیانتداری کے ساتھ انجام دیا جائے تاکہ انتخابی فہرست ہر قسم کی خامیوں سے پاک ہو۔ ادھر ڈپٹی الیکشن آفیسر (ہیڈکوارٹر) دھیرج کمار ٹھاکر نے ہٹیا اسمبلی حلقہ کے پولنگ مراکز کا دورہ کر کے بی ایل اوز کو مقررہ مدت کے اندر معیاری انداز میں کام مکمل کرنے کی ہدایت دی۔ الیکشن کمیشن کا مقصد ہے کہ کوئی بھی اہل ووٹر فہرست سے محروم نہ رہے اور غلط یا غیر مجاز اندراجات کی بروقت اصلاح کی جا سکے۔