آیوشمان بھارت یوجنا میں جھارکھنڈ کو ملک بھر میں پہلا مقام

مرکزی وزارت صحت نے ریاست کو اعزاز سے نوازا؛ رانچی صدر ہسپتال بنا رول ماڈل

جدید بھارت نیوز سروس
رانچی، 18 اپریل:۔ آیوشمان بھارت پردھان منتری جن آروگیہ یوجنا کے تحت جھارکھنڈ نے ملک بھر میں بہترین کارکردگی کا مظاہرہ کرتے ہوئے پہلی پوزیشن حاصل کی ہے۔ پونے میں منعقدہ قومی سطح کے ‘چنتن شیور ‘ (غور و فکر کیمپ) میں مرکزی وزارت صحت و خاندانی بہبود نے ریاست کو اس نمایاں کامیابی پر اعزاز سے نوازا۔ یہ اعزاز جھارکھنڈ کو علاج کے کلیمز کی معیاری ادائیگی، شفافیت اور صحت کے بہتر انتظام و انصرام کے لیے دیا گیا ہے، جو ریاست کے طبی نظام میں نمایاں بہتری کی عکاسی کرتا ہے۔
ریاستی وزیر صحت کا اظہارِ مسرت اور ٹیم کو مبارکباد
وزیر صحت ڈاکٹر عرفان انصاری نے اس کامیابی پر خوشی کا اظہار کرتے ہوئے کہا کہ یہ مسلسل محنت، عزم اور ٹیم ورک کا نتیجہ ہے۔ انہوں نے کہا کہ حکومت نے عوام سے جو وعدہ کیا تھا اسے پورا کر دکھایا ہے اور مستقبل میں بھی بہتر طبی سہولیات کی فراہمی جاری رہے گی۔ وزیر صحت نے خاص طور پر رانچی صدر ہسپتال کی ستائش کرتے ہوئے کہا کہ یہ ہسپتال آیوشمان یوجنا کے تحت ملک میں نمبر ون بن کر ابھرا ہے اور ایک رول ماڈل کے طور پر سامنے آیا ہے۔ یہ پوری ریاست کے طبی ڈھانچے کی اجتماعی جیت ہے۔
قومی سطح پر جھارکھنڈ کی ٹیم کی نمائندگی
پونے میں 17 اور 18 اپریل کو منعقدہ اس پروگرام میں جھارکھنڈ اسٹیٹ آروگیہ سوسائٹی کی ٹیم نے شرکت کی۔ اس ٹیم میں چھوی رنجن، سیما سنگھ، ویبھو رائے، ڈاکٹر اکھلیش کمار جھا اور آشیش رنجن شامل تھے۔ ٹیم نے رانچی صدر ہسپتال کی کارکردگی اور وہاں کے طریقہ کار کو ملک بھر سے آئے ہوئے نمائندوں کے سامنے پیش کیا، جسے خوب سراہا گیا۔
طبی عملے کے حوصلوں میں اضافہ
ریاست کو ملنے والا یہ اعزاز نہ صرف جھارکھنڈ کے لیے باعث فخر ہے بلکہ اس سے ڈاکٹروں اور دیگر طبی عملے کے حوصلے بھی بلند ہوں گے۔ یہ کامیابی اس بات کا ثبوت ہے کہ جھارکھنڈ صحت کی خدمات میں نئے معیارات قائم کر رہا ہے۔ وزیر صحت نے پوری ٹیم کو مبارکباد دیتے ہوئے بھروسہ دلایا کہ ریاست مستقبل میں بھی اسی طرح کی کارکردگی برقرار رکھے گی اور دیگر ریاستوں کے لیے مثال بنے گی۔