اسلحہ کو سرکاری کنٹرول میں لینے پر زور
ریاض،مسقط،عمان، 17 اپریل (یو این آئی) شام، اردن، سعودی عرب اور عمان نے امریکہ کے صدر ڈونلڈ ٹرمپ کے اعلان کردہ اسرائیل اور لبنان کے درمیان دس روزہ جنگ بندی کا خیرمقدم کیا اور لبنانی ریاست کو مضبوط بنانے اور اس کے اداروں تک ہتھیار محدود رکھنے کی حمایت کا اظہار کیا۔شام نے اسے خطے میں مزید کشیدگی کا سد باب کی طرف ‘اہم قدم، قرار دیا۔ شامی خبر رساں ادارے صنا کے مطابق ایک بیان میں وزارتِ خارجہ نے کہا کہ دمشق لبنان کی وحدت، خودمختاری اور ارضی سالمیت کے تحفظ اور اپنے عوام کی سلامتی کو یقینی بنانے کے لیے کیے جانے والے تمام اقدامات کی حمایت کرتا ہے۔ وزارت نے اس معاہدے کو یقینی بنانے میں مدد کرنے والی علاقائی اور بین الاقوامی کوششوں کی بھی قدردانی کی، اور شام کی لبنان اور وسیع عرب خطے میں استحکام اور امن کو فروغ دینے کی کوششوں میں تعاون کے لیے آمادگی کی تصدیق کی۔اردن کی وزارتِ خارجہ نے لبنانی صدر جوزف عون، وزیرِ اعظم نواف سلام اور پارلیمنٹ کے اسپیکر نبیہ بری کے اس جنگ بندی کو یقینی بنانے میں ادا کردہ ‘اہم مثبت کردار، کی تعریف کی۔ وزارت نے اردن کی لبنانی ریاست کی مکمل حمایت کی تصدیق کی کہ وہ تمام لبنانی علاقوں میں اپنی خودمختاری قائم کرے، ہتھیار ریاست تک محدود رکھے اور قومی اداروں کو بحال کرے۔سعودی عرب نے بھی جنگ بندی کا خیرمقدم کیا اور عون، سلام اور بری کے کردار کی ستائش کی۔ دفترِ خارجہ کے ایکس پر جاری کردہ ایک بیان میں کہا گیاہے کہ حکومت ‘لبنانی ریاست کی خودمختاری کے دائرے کو بڑھانے اور ہتھیاروں کو ریاست اور اس کے جائز اداروں تک محدود رکھنے کی حمایت کرتی ہے۔ عمان نے بھی اس عارضی جنگ بندی کا خیر مقدم کیا اور تمام فریقین پر زور دیا کہ وہ اس کی شرائط کی پابندی کریں اور ایسی کسی بھی کارروائی سے گریز کریں جو اسے کمزور کر سکے۔وزارتِ خارجہ نے معاہدے کو یقینی بنانے کے لیے امریکی کوششوں کو بھی سراہا۔ اس سے قبل جمعرات کو ٹرمپ نے اعلان کیا کہ اسرائیل اور لبنان دس روزہ جنگ بندی شروع کریں گے۔ ٹرمپ نے اپنے Truth Social پلیٹ فارم پر کہا: ‘میں نے ابھی لبنان کے انتہائی معزز صدر جوزف عون اور نیتن یاہو کے ساتھ بہت اچھے مذاکرات کیے ہیں۔ انہوں نے مزید کہا: ‘ان دونوں رہنماؤں نے اتفاق کیا ہے کہ اپنے ممالک کے درمیان امن کے حصول کے لیے رسمی طور پر دس روزہ جنگ بندی شروع کریں گے۔۔ یہ اعلان امریکی ثالثی میں ہونے والی بات چیت کے بعد آیا جو منگل کو واشنگٹن ڈی سی کے اسٹیٹ ڈیپارٹمنٹ میں لبنانی اور اسرائیلی وفود کے درمیان ہوئی تھی۔امریکہ اور اسرائیل نے 28 فروری کو ایران پر حملے شروع کیے، جس کے نتیجے میں تہران نے اسرائیل اور خلیج میں امریکہ کے اتحادیوں کے خلاف جوابی کارروائیاں کیں، اور لبنان میں حزبِ اللہ نے بھی ردِعمل دیا۔ اس کے بعد اسرائیل نے حزبِ اللہ پر حملے شروع کیے، جن میں پچھلے چھ ہفتوں میں دو ہزار سے زائد افراد ہلاک اور ایک ملین بے گھر ہو گئے۔ گزشتہ ہفتے امریکہ اور ایران کے درمیان بھی ایک جنگ بندی طے پایا، اور جنگ کو مستقل طور پر ختم کرنے کی کوششیں جاری ہیں۔
