اقوام متحدہ کی سلامتی کونسل ’’فوسل‘‘ نہیں بلکہ زندہ ادارہ ہونی چاہیے

بھارت کا اصلاحات اور توسیع کا مطالبہ دوبارہ دہرا دیا

اقوام متحدہ۔27؍ مئی۔ ایم این این۔ بھارت نے ایک بار پھر اقوام متحدہ کی سلامتی کونسل (UNSC) میں فوری اصلاحات اور اس کی توسیع کا مطالبہ کرتے ہوئے کہا ہے کہ سلامتی کونسل کو “ماضی کا فوسل” نہیں بلکہ ایک “زندہ اور متحرک ادارہ” ہونا چاہیے جو موجودہ عالمی حقائق کی نمائندگی کرے۔ اقوام متحدہ میں بھارت کے مستقل مشن کے نمائندے پی ہریش نے سلامتی کونسل سے متعلق ایک مباحثے کے دوران کہا کہ موجودہ عالمی نظام دوسری عالمی جنگ کے بعد کے دور کی عکاسی کرتا ہے، جبکہ آج کی جغرافیائی، اقتصادی اور آبادیاتی حقیقتیں مکمل طور پر بدل چکی ہیں۔ انہوں نے کہا کہ 80 سال پرانے ڈھانچے کے ساتھ 21ویں صدی کے بحرانوں سے مؤثر انداز میں نمٹنا ممکن نہیں۔ بھارتی نمائندے نے زور دے کر کہا کہ سلامتی کونسل میں مستقل اور غیر مستقل دونوں زمروں میں توسیع ضروری ہے تاکہ ترقی پذیر ممالک، افریقہ، گلوبل ساؤتھ اور ابھرتی ہوئی معیشتوں کو مناسب نمائندگی مل سکے۔ ان کے مطابق محدود نمائندگی اور چند ممالک کو حاصل خصوصی اختیارات اقوام متحدہ کی ساکھ اور مؤثریت کو متاثر کر رہے ہیں۔ بھارت نے کہا کہ عالمی امن، سلامتی، دہشت گردی، موسمیاتی تبدیلی اور انسانی بحرانوں جیسے مسائل پر سلامتی کونسل کی سست اور غیر متوازن کارروائیوں نے اصلاحات کی ضرورت کو مزید نمایاں کر دیا ہے۔ بھارتی مؤقف کے مطابق موجودہ کونسل “آج کی دنیا کی طاقت کے توازن” کی نمائندگی نہیں کرتی۔ بھارت طویل عرصے سے جرمنی، جاپان اور برازیل کے ساتھ G4 گروپ کے تحت سلامتی کونسل میں مستقل رکنیت کی مہم چلا رہا ہے۔ بھارت کا مؤقف ہے کہ وہ دنیا کی سب سے بڑی جمہوریت، بڑی معیشت، ایٹمی طاقت اور اقوام متحدہ امن مشنز میں نمایاں کردار ادا کرنے والا ملک ہونے کے باعث مستقل نشست کا حقدار ہے۔ اقوام متحدہ کے سیکریٹری جنرل اینٹینو گوٹریس بھی حالیہ مہینوں میں سلامتی کونسل میں جامع اصلاحات کی حمایت کر چکے ہیں۔ انہوں نے کہا تھا کہ دنیا بدل چکی ہے لیکن سلامتی کونسل اب بھی “ایک گزرے ہوئے دور” میں پھنسی ہوئی ہے۔ تجزیہ کاروں کے مطابق سلامتی کونسل اصلاحات پر عالمی سطح پر عمومی اتفاق رائے تو موجود ہے، لیکن مستقل اراکین کے ویٹو اختیارات اور مختلف علاقائی مفادات کے باعث عملی پیش رفت اب تک ممکن نہیں ہو سکی۔