بارش سے پہلے 31 مئی تک نالوں کی صفائی کا کام مکمل کریں: ڈاکٹر سنگیتا

حاجی پور:نگر پریشد کے سبھاگار میں نالوں کی صفائی (اُڑاہی) کے سلسلے میں ایک جائزہ میٹنگ منعقد کی گئی۔ میٹنگ کی صدارت نگر پریشد کی چیئرپرسن ڈاکٹر سنگیتا کماری نے کی، جبکہ نظامت ایگزیکٹو آفیسر سشیل کمار نے کی۔اس دوران شہر میں جاری نالوں کی صفائی کے کام کا جائزہ لیا گیا۔میٹنگ میں یہ بھی ہدایت دی گئی کہ جہاں جہاں ناجائز قبضہ کرکے نالوں کو بند کیا گیا ہے، وہاں سے قبضہ ہٹاکر نالوں کی صفائی کی جائے۔ اس کام میں وارڈ کونسلروں کی نگرانی میں ایجنسی کام کرے گی۔ شہر کے تمام نالوں کی صفائی ہر حال میں مقررہ مدت کے اندر مکمل کی جانی چاہیے تاکہ برسات کے دوران پانی جمع ہونے کی صورتحال پیدا نہ ہو۔چیئرپرسن ڈاکٹر سنگیتا کماری نے بتایا کہ جس طرح مرکزی نالوں کی صفائی کی گئی ہے، اسی طرح اب تمام وارڈوں کے گلی محلوں اور لنک روڈ کے نالوں کی بھی وقت پر صفائی کی جائے۔ انہوں نے کہا کہ مون سون سے پہلے تمام نالوں کی صفائی ضروری ہے تاکہ شہریوں کو پانی جمع ہونے کی پریشانی سے راحت مل سکے۔ اس کے لیے ایجنسی کو 31 مئی تک کا وقت دیا گیا ہے۔وہیں ایگزیکٹو آفیسر سشیل کمار نے تمام ملازمین کو ہدایت دیتے ہوئے کہا کہ نالوں کی صفائی کے کام میں کسی بھی طرح کی رکاوٹ برداشت نہیں کی جائے گی۔ اگر کوئی شخص اس کام میں خلل ڈالتا ہے تو فوری طور پر اطلاع دی جائے تاکہ اس کے خلاف کارروائی کی جا سکے۔میٹنگ میں سٹی منیجر ڈاکٹر سوریا پرکاش، سٹی منیجر دیپک کمار تیواری، وارڈ جمعدار، ایجنسی کے سپروائزر، صفائی سپروائزر سمیت نگر پریشد کے کئی ملازمین موجود رہے۔