شریاس ایئر کی شاندار فارم، سلیکٹرز کی توجہ حاصل کی

ممبئی، 17 اپریل (یو این آئی) شریس ایئر نے آئی پی ایل 2026 میں اپنی گزشتہ تین اننگز میں 50، ناٹ آوٹ 69 اور 66 رنز بنائے ہیں۔ یہی وہ وجوہات ہیں جن کی بنا پر پنجاب کنگز اس وقت چار جیت اور ایک واش آؤٹ کے ساتھ پوائنٹس ٹیبل میں سرفہرست ہے۔ ان کی حالیہ شاندار کارکردگی کے بعد ایرون فنچ کے پاس ان کی تعریف کے لیے الفاظ کم پڑ گئے۔پنجاب کی ممبئی انڈینز پر جیت کے بعد فنچ نے ‘ای ایس پی این کرک انفو‘ کے ٹائم آؤٹ شو میں کہا، “انہیں کھیلتے دیکھ کر حیرانی ہوتی ہے کہ وہ کتنے باصلاحیت ہیں۔ انہوں نے گزشتہ اور موجودہ آئی پی ایل کے درمیان کوئی ٹی20 میچ نہیں کھیلا اور اس کے باوجود شروع سے ہی دھماکہ خیز کارکردگی کا مظاہرہ کیا ہے۔ ان کی کپتانی شاندار ہے۔ یہ دیکھ کر حیرت ہوتی ہے کہ وہ ہندوستان کے لیے مزید کرکٹ کیوں نہیں کھیلتے۔”انہوں نے مزید کہا، “وہ بہترین کھلاڑی ہیں اور ان کا کھیل دیکھنے میں بہت اچھا لگتا ہے۔ وہ گیند کو زور سے مارنے کی کوشش نہیں کرتے، بلکہ وکٹ کے دونوں طرف کھیلتے ہیں۔ فرنٹ فٹ اور بیک فٹ دونوں پر ان کا کھیل شاندار ہے۔ اب انہوں نے شارٹ پچ گیندوں کے خلاف اپنی کمزوری کو بھی دور کر لیا ہے اور اسے مکمل کنٹرول کے ساتھ کھیلتے ہیں۔”فنچ کے ساتھ موجود پیوش چاولہ کا بھی ماننا ہے کہ ایئر کو ٹیم میں ہونا چاہیے۔ چاولہ نے کہا، “میرے خیال میں اگر میں سلیکٹر ہوتا تو وہ براہ راست ٹیم میں جگہ پاتے۔ وہ مڈل آرڈر کے بہترین کھلاڑیوں میں سے ایک ہیں۔ ان کے پاس کرکٹ کا بہترین دماغ ہے اور وہ ٹیم کی قیادت بھی کر سکتے ہیں۔”2025 کے آغاز سے اب تک آئی پی ایل میں 500 سے زیادہ رنز بنانے والے 22 بلے بازوں میں ان کا اسٹرائیک ریٹ تیسرا سب سے زیادہ ہے۔ ابھیشیک شرما اور ان کے ساتھی کھلاڑی پرینش آریہ ہی ان سے اوپر ہیں۔ اس دوران ان کی اوسط بھی تیسری بہترین ہے، جس میں صرف وراٹ کوہلی اور جوس بٹلر ان سے آگے ہیں۔پنجاب کے اسپن گیند بازی کوچ سائی راج نے کہا کہ وقت کے ساتھ ایئر نے اپنے کھیل کو بہت اچھی طرح سمجھ لیا ہے۔ وہ جانتے ہیں کہ کس گیند باز کو نشانہ بنانا ہے اور شارٹ گیند کی حکمتِ عملی کا مقابلہ کیسے کرنا ہے۔
پنجاب کی حالیہ کامیابی کی ایک بڑی وجہ ہدف کا تعاقب کرنے کی صلاحیت بھی ہے۔ تمام ٹی20 کرکٹ میں ان کے نام 200 سے زیادہ رنز کے ہدف کا سب سے زیادہ 10 بار کامیابی سے پیچھا کرنے کا ریکارڈ ہے۔ ان میں سے تین کامیابیوں کے وقت ایئر ٹیم کے کپتان تھے۔ جمعرات کو پنجاب نے 196 رنز کا ہدف 21 گیندیں باقی رہتے حاصل کر لیا۔قومی ٹیم میں واپسی کے حوالے سے فنچ نے کہا کہ ہندوستان کی بینچ اسٹرینتھ بہت مضبوط ہے، جو کسی بھی ٹیم کو ہرا سکتی ہے۔ تاہم، انہوں نے یہ بھی کہا کہ آسٹریلیا میں ہونے والے اگلے ٹی20 ورلڈ کپ کے لیے شریس ایئر جیسے کھلاڑیوں کی ضرورت ہوگی جو اچھال والی پچوں پر اچھا کھیل سکیں۔