ایک بڑا فیصلہ کن معرکہ
ملاں پور، 26 مئی (یواین آئی ) آئی پی ایل 2026 کا ‘الیمینیٹر‘ معرکہ ایک ہائی وولٹیج ٹکراؤ بن چکا ہے، جہاں آج راجستھان رائلز اور سن رائزرز حیدرآباد کی ٹیمیں ایک دوسرے کو ٹورنامنٹ سے باہر کرنے کے لیے میدان میں اتریں گی۔ اس مقابلے کو جہاں نوجوان جوش اور تجربہ کار طاقت کا ٹکراؤ قرار دیا جا رہا ہے، وہیں کرکٹ شائقین کی نظریں انفرادی مقابلوں پر بھی جمی ہوئی ہیں۔راجستھان کی حالیہ واپسی کا سہرا نوجوان بلے باز وئیبھو سوریہ ونشی کے سر جاتا ہے، جنہوں نے اسی سیزن میں حیدرآباد کے خلاف شاندار سنچری اسکور کر کے ان کی بالنگ کی خامیاں بے نقاب کی تھیں۔راجستھان کے پاس جوفرا آرچر کی صورت میں پاور پلے کا سب سے مہلک ہتھیار موجود ہے۔ ان کا اصل ہدف حیدرآباد کی خطرناک اوپننگ جوڑی—ٹرویس ہیڈ اور ابھشیک شرما—کو جلد آؤٹ کر کے دباؤ بڑھانا ہوگا۔حیدرآباد کی طاقت ان کی جارحانہ بیٹنگ ہے جس میں ہینرک کلاسن اور ایشان کشن جیسے بڑے نام شامل ہیں۔ تاہم، ٹاپ آرڈر پر حد سے زیادہ انحصار ان کی کمزوری بھی ثابت ہو سکتا ہے۔راجستھان کی ٹیم ممبئی انڈینز کے خلاف جیت کے بعد بلند حوصلوں کے ساتھ میدان میں اتر رہی ہے۔ ان کی بیٹنگ سوریہ ونشی اور یشسوی جیسوال کے گرد گھومتی ہے، جبکہ باؤلنگ میں ناندرے برگر اور آرچر کا ساتھ بہترین اسپن اٹیک دے رہا ہے۔یہ میچ ملاں پور کے مہاراجہ یادویندر سنگھ انٹرنیشنل اسٹیڈیم میں کھیلا جائے گا، جو عام طور پر ہائی اسکورنگ گراؤنڈ مانا جاتا ہے۔ دوسری اننگز میں اوس کا عنصر اہم ہوگا، جس کی وجہ سے ٹاس جیتنے والی ٹیم پہلے فیلڈنگ کو ترجیح دے سکتی ہے۔اگرچہ اس سیزن کے ہیڈ ٹو ہیڈ ریکارڈ میں حیدرآباد کا پلڑا تھوڑا بھاری رہا ہے، لیکن راجستھان کی اس گراؤنڈ سے واقفیت اور حالیہ فارم انہیں ایک سخت حریف بناتی ہے۔
