ڈیوالڈ بریوس نے سی ایس کے کے ابھرتے ہوئے ستارے کی جم کر تعریف کی
چنئی، 15 اپریل (یو این آئی): چنئی سپر کنگز (سی ایس کے) نے ٹاٹا آئی پی ایل 2026 میں اپنی مسلسل دوسری جیت درج کرتے ہوئے کولکتہ نائٹ رائیڈرز (کے کے آر) کو 32 رنز سے آسانی سے شکست دے دی۔ اس موقع پر سی ایس کے کے کھلاڑی ڈیوالڈ بریوس نے جیو اسٹار ماہرین روی چندرن اشون اور ڈیل اسٹین کے ساتھ مل کر آیوش مہاترے کی شاندار بلے بازی، کپتان رتوراج گائیکواڈ کی فارم اور کے کے آر کی واپسی کی صلاحیت پر اپنے خیالات کا اظہار کیا۔بریوس نے میچ کے تجربے کے بارے میں کہا، “یہ واقعی بہت دلچسپ مقابلہ تھا۔ یہاں ہزاروں پُرجوش شائقین کی موجودگی کے سامنے ایک خاص احساس تھا۔ میں نے وکٹ کو سمجھنے میں وقت گزارا، جو پچھلی رات کے مقابلے میں تھوڑی مختلف تھی۔ سائیڈ اسٹرین کی وجہ سے باہر رہنے کے بعد اب میں مضبوط محسوس کر رہا ہوں اور مجھے خوشی ہے کہ ہم جیت گئے۔”ٹیم کے نوجوان کھلاڑی آیوش مہاترے کی تعریف کرتے ہوئے انہوں نے کہا، “مہاترے خاص ہیں، وہ ابھی بہت جوان ہیں اور جس بے خوفی سے وہ کھیلتے ہیں وہ لاجواب ہے۔ میری خواہش ہے کہ وہ ہمیشہ اپنا فطری کھیل ٍ کھیلیں اور خود پر یقین رکھیں۔ وہ گیند کے مطابق ردِعمل دیتے ہیں اور اسے وہیں مارتے ہیں جہاں اسے جانا چاہیے۔”روی چندرن اشون نے کپتان رتوراج گائیکواڈ کی فارم پر بات کرتے ہوئے کہا، “بطور کپتان فتوحات حاصل کرنے سے انہیں ٹورنامنٹ میں آسانی ہونی چاہیے۔ ٹی 20 میں آپ کو مسلسل ارادہ دکھانا ہوتا ہے۔ اگر آپ آیوش مہاترے یا سنجو سیمسن کو دیکھیں تو انہوں نے درست آپشنز کا انتخاب کیا۔ رتوراج تھوڑا جلدی شاٹس کھیلنے کی کوشش میں کیچ آؤٹ ہو رہے ہیں۔ اگر وہ اننگز کے آغاز میں گیند کو تھوڑا وقت دیں اور گراؤنڈ کے سیدھے رخ پر کھیلیں تو یہ ان کے لیے بہتر ہوگا۔”کے کے آر کی واپسی کے بارے میں اشون نے 2021 کی مثال دیتے ہوئے کہا کہ تب بھی کے کے آر بری طرح ہارنے کے بعد اٹھ کھڑی ہوئی تھی۔
انہوں نے کہا کہ ٹیم میں تیجسوی دہیا اور سوربھ دوبے جیسے نئے کھلاڑیوں کی موجودگی سے ایک نئی توانائی آ سکتی ہے، حالانکہ اس سال کے کے آر کے لیے واپسی اتنی آسان نہیں ہوگی۔جیو اسٹار ماہر ڈیل اسٹین نے سی ایس کے کی مہم میں تبدیلی کا سہرا سنجو سیمسن کے سر باندھا۔ انہوں نے کہا، “ڈی سی کے خلاف سنجو سیمسن کی اس سنچری نے ڈریسنگ روم کا ماحول بدل دیا ہے۔ آئی پی ایل میں ایک جیت کے بعد ٹیم کا اعتماد اچانک بہت بڑھ جاتا ہے اور آپ وہ کام کرنے لگتے ہیں جو چند دن پہلے مشکل لگ رہے تھے۔ سیمسن واقعی سامنے سے ٹیم کی قیادت کر رہے ہیں۔”
