نئی دہلی3، مئی ۔ ایم این این ۔کاشی کی فضا اس وقت ایک نئے سائنسی و ثقافتی تجربے کی گواہ بنی جب وزیر اعظم نریندر مودی نے حالیہ دورۂ کاشی کے دوران مندر احاطے میں نصب’وکرمادتیہ ویدک گھڑی’ کا تفصیلی جائزہ لیا۔ بابا وشوناتھ کے درشن کے بعد اس گھڑی کو دیکھتے ہوئے وزیر اعظم نے اسے’قدیم علم اور جدید سائنسی نقطۂ نظر کا بہترین امتزاج‘ قرار دیا، جس کے بعد یہ منفرد ایجاد عالمی سطح پر موضوعِ بحث بن گئی ہے۔یہ ویدک گھڑی عام گھڑیوں سے یکسر مختلف ہے۔ جہاں عام گھڑیاں 24 گھنٹوں پر مبنی ہوتی ہیں، وہیں یہ گھڑی سورج کے طلوع پر مبنی 30 گھنٹوں کے چکر پر کام کرتی ہے۔ اسے اجین کے مہاراجہ وکرمادتیہ ریسرچ انسٹی ٹیوٹ نے تیار کیا ہے، جو وقت کو 30 مہورت‘ میں تقسیم کرتی ہے۔ اس گھڑی کی خاص بات یہ ہے کہ یہ صرف وقت ہی نہیں بتاتی بلکہ تاریخ، نکشتر، یوگ، کرن اور سیاروں کی درست پوزیشن بھی ظاہر کرتی ہے، جس سے بھارتی پنچانگ کو سمجھنا عام لوگوں کے لیے بھی آسان ہو گیا ہے۔اس گھڑی کی تنصیب کے پیچھے مدھیہ پردیش اور اتر پردیش کی مشترکہ کوشش شامل ہے۔ مدھیہ پردیش کے وزیر اعلیٰ موہن یادو نے یہ گھڑی اتر پردیش کے وزیر اعلیٰ یوگی آدتیہ ناتھ کو تحفے میں دی تھی، جسے 4 اپریل کو کاشی وشوناتھ مندر کے احاطے میں نصب کیا گیا۔
تاہم وزیر اعظم کی جانب سے اس کی تعریف کے بعد سوشل میڈیا پر VikramotsavVaranasi ٹرینڈ کرنے لگا اور لاکھوں لوگ اس جدید ویدک نظام کے مداح بن گئے۔ دلچسپ بات یہ ہے کہ اس منصوبے کو صرف ایک فزیکل گھڑی تک محدود نہیں رکھا گیا۔ اس کا ایک موبائل ایپ بھی تیار کیا گیا ہے، جو گوگل پلے اسٹور پر دستیاب ہے اور 189 زبانوں کو سپورٹ کرتا ہے۔ اس ایپ میں تقریباً 7 ہزار سال پر محیط پنچانگ کی معلومات شامل ہیں، جبکہ ویدک الارم جیسی سہولت بھی فراہم کی گئی ہے، جو صارفین کو شُبھ اور اشُبھ اوقات سے آگاہ کرتی ہے۔ اس طرح یہ ایپ دنیا بھر میں فلکیات کے شوقین افراد کے لیے ایک اہم ذریعہ بن چکی ہے۔وارانسی میں اس کامیابی کے بعد اب حکومت اس منصوبے کو مزید وسعت دینے کی تیاری کر رہی ہے۔ حکام کے مطابق جلد ہی ملک کے دیگر اہم جیوترلنگ مندروں اور ایودھیا کے رام مندر میں بھی اسی طرز کی ویدک گھڑیاں نصب کی جائیں گی۔ اس اقدام کا مقصد بھارت کی قدیم سائنسی وراثت کو عام لوگوں تک پہنچانا اور نئی نسل کو یہ باور کرانا ہے کہ ہمارے آبا و اجداد وقت کی پیمائش میں غیر معمولی مہارت رکھتے تھے۔
وارانسی میں وزیر اعظم نریندر مودی نے دیکھا ’کال چکر‘
